ప్రచారంలో వివేక్‌ రామస్వామి దూకుడు

వాషింగ్టన్‌: అమెరికా అధ్యక్ష ఎన్నికల్లో రిపబ్లికన్‌ పార్టీ తరఫున అభ్యర్థిత్వం కోసం పోటీ పడుతున్న ప్రముఖ భారతీయ అమెరికన్‌ వివేక్‌ రామస్వామి ప్రచారంలో దూసుకెళ్తున్నారు. ఆయన గత వారం ఏకంగా 42 ప్రచార కార్యక్రమాల్లో పాల్గొన్నారు. వచ్చే వారం కూడా 38 ప్రచార కార్యక్రమాల్లో పాల్గొనేందుకు ప్రణాళికలు సిద్ధం చేసుకున్నట్లు సమాచారం. ప్రస్తుతం అమెరికా అధ్యక్ష ఎన్నికల బరిలో దిగేందుకు ప్రయత్నిస్తున్న ఇతర అభ్యర్థుల కంటే ప్రచారపర్వంలో ఆయన చాలా ముందున్నారు. ప్రచారంలో అంత ఉత్సాహంగా ఎలా పాల్గొంటున్నారంటూ విలేకరులు అడిగిన ప్రశ్నకు రామస్వామి స్పందిస్తూ.. ‘‘నా ప్రచార కార్యక్రమాలకు హాజరవుతున్న ప్రజలను చూస్తుంటే.. ఎంతో శక్తి లభిస్తోంది. దేశం పట్ల వారికి ఉన్న శ్రద్ధే నన్ను ప్రోత్సహిస్తోంది. సామాజిక మాధ్యమాలు, టెలివిజన్‌ ప్రసారాలతో కూడా ఈ స్థాయి ప్రచారం అసాధ్యం. విరాళాల కోసం ప్రత్యేక కార్యక్రమాలు నిర్వహించడం కంటే పిజ్జా అవుట్‌లెట్లలో ప్రజలతో సంభాషించడం మేలని భావిస్తున్నా. మనం ప్రాతినిధ్యం వహిస్తున్న ప్రజలతో మమేకం కావడానికి ఇదే సరైన మార్గం. రిపబ్లికన్‌ పార్టీ అభ్యర్థిగా నా ఎన్నికపై పూర్తి విశ్వాసం ఉంది’’ అని వివేక్‌ తెలిపారు.