మూడేళ్లు మీకు.. రెండేళ్లు మాకు!

పాక్‌ ప్రధాని పదవిపై పీఎంఎల్‌-ఎన్‌, పీపీపీ చర్చలు
తెరపైకి బిలావల్‌ భుట్టో పేరు

లాహోర్‌: పాకిస్థాన్‌లో సైన్యం ఆశీస్సులు పుష్కలంగా ఉన్న నవాజ్‌ షరీఫ్‌ పాకిస్థాన్‌ పగ్గాలు చేపట్టేందుకు దాదాపు రంగం సిద్ధమైంది. ఆదివారం షరీఫ్‌ నేతృత్వంలోని పాకిస్థాన్‌ ముస్లిం లీగ్‌-నవాజ్‌ (పీఎంఎల్‌-ఎన్‌), బిలావల్‌ భుట్టో జర్దారీ నాయకత్వంలోని పాకిస్థాన్‌ పీపుల్స్‌ పార్టీ (పీపీపీ)లు సంకీర్ణ ప్రభుత్వం ఏర్పాటు చేసేందుకు సూత్రప్రాయంగా అంగీకరించాయి. ఈ చర్చల్లో అధికార పంపకంపై కొన్ని కీలక ప్రతిపాదనలు ముందుకొచ్చాయని సమాచారం. తమ ఛైర్మన్‌ బిలావల్‌ భుట్టో జర్దారీకి ప్రధాని పదవి కావాలని పీపీపీ గట్టిగా పట్టుబడినట్లు సమాచారం. ప్రధాని పదవిని మూడేళ్లు పీఎంఎల్‌-ఎన్‌, రెండేళ్లు పీపీపీ పంచుకోవాలన్న ప్రతిపాదనపైనా కసరత్తు జరుగుతోందని బిలావల్‌ వర్గాలు చెబుతున్నాయి. ప్రధాని పగ్గాలను ఏ పార్టీ ముందు స్వీకరించాలన్న విషయంపై స్పష్టత రాలేదని తెలుస్తోంది. పీఎంఎల్‌-ఎన్‌ తరఫున నవాజ్‌ షరీఫే ప్రధాని బాధ్యతలు చేపట్టే అవకాశం ఉంది. 265 జాతీయ అసెంబ్లీ సీట్లకు జరిగిన ఎన్నికల్లో పీఎంఎల్‌-ఎన్‌కు 75 స్థానాలు దక్కాయి.

ఇమ్రాన్‌ సారథ్యంలోని పాకిస్థాన్‌ తెహ్రీకే ఇన్సాఫ్‌ పార్టీ నుంచి స్వతంత్రులుగా పోటీచేసిన అభ్యర్థులు అత్యధికంగా 101 స్థానాలు సాధించారు. పీఎంఎల్‌-ఎన్‌ అధికారంలోకి రావాలంటే 54 సీట్లలో విజయం సాధించిన పీపీపీ మద్దతు తప్పనిసరి. పీఎంఎల్‌-ఎన్‌, పీపీపీ పార్టీలు కలిస్తే మొత్తం 129 సీట్లు అవుతాయి. ఆరుగురు స్వతంత్రులు కూడా ఆదివారం పార్టీలో చేరినట్లు పీఎంఎల్‌-ఎన్‌ ప్రకటించింది. 17 సీట్లు నెగ్గిన ఎంక్యూఎం-పీతోనూ చర్చలు జరుగుతున్నాయని పేర్కొంది. మరోవైపు పీఎంఎల్‌-ఎన్‌, పీపీపీ ఏర్పరిచే సంకీర్ణ ప్రభుత్వంలో తాము చేరే ప్రసక్తే లేదని ఇమ్రాన్‌ సారథ్యంలోని పాకిస్థాన్‌ తెహ్రీకే ఇన్సాఫ్‌ (పీటీఐ) స్పష్టం చేసింది. వారితో కూటమి కట్టే కంటే.. ప్రతిపక్షంలో కూర్చోవడానికి ఇష్టపడతామని పేర్కొంది.