పుతిన్‌కు మోదీ శుభాకాంక్షలు

పలు అంశాలపై ఫోన్‌లో ఇరువురు నేతల చర్చ

దిల్లీ: రష్యా అధ్యక్షుడిగా అయిదోసారి ఎన్నికైన వ్లాదిమిర్‌ పుతిన్‌కు భారత ప్రధాని నరేంద్ర మోదీ బుధవారం శుభాకాంక్షలు తెలిపారు. ఇద్దరు నేతల మధ్య జరిగిన టెలిఫోన్‌ సంభాషణలో దైపాక్షిక సహకారంలో పురోగతి, ప్రాంతీయ, అంతర్జాతీయ సమస్యలపై తమ అభిప్రాయాలను పంచుకున్నారు. ఈ సందర్భంగా రష్యా-ఉక్రెయిన్‌ వివాద పరిష్కారానికి చర్చలు, దౌత్యపరమైన చర్యలే శరణ్యమని ప్రధాని మోదీ మరోసారి పుతిన్‌కు సూచించారు. రానున్న సంవత్సరాల్లో రెండ[ు దేశాల మధ్య వ్యూహాత్మక భాగస్వామ్యాన్ని మరింత పటిష్ఠం చేసే దిశగా ప్రయత్నించేందుకు ఇరువురు నేతలు అంగీకరించారు.

ఉక్రెయిన్‌ వివాద పరిష్కార యత్నాలకు భారత్‌ మద్దతు

రష్యా-ఉక్రెయిన్‌ వివాదం వీలైనంత త్వరగా, శాంతియుతంగా పరిష్కారం అయ్యేందుకు జరిగే అన్ని ప్రయత్నాలకు భారత్‌ మద్దతిస్తుందని ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీతో ప్రధాని మోదీ పేర్కొన్నారు. ఆ దేశానికి మానవతా సహాయాన్ని కొనసాగిస్తుందని భరోసా ఇచ్చారు. జెలెన్‌స్కీతో బుధవారం మోదీ టెలిఫోన్‌లో సంభాషించారు. ఈ సందర్భంగా రష్యా-ఉక్రెయిన్‌ల మధ్య కొనసాగుతున్న వివాదంపై చర్చించారు. సమస్య పరిష్కారం దిశగా ముందుకు వెళ్లడానికి చర్చలు, దౌత్యపరమైన చర్యలను తీసుకోవాలని సూచించారు.