Mysterious Object: ఆ అంతుచిక్కని వస్తువు.. భారత రాకెట్‌ శకలమే..!

కాన్‌బెర్రా: ఆస్ట్రేలియా తీరంలో ఓ అంతుచిక్కని వస్తువు (Mysterious Object) ఇటీవల కలకలం రేపిన విషయం తెలిసిందే. ధ్వంసమైన స్థితిలో భారీ స్థూపాకారపు రాగి రంగు లోహాపు వస్తువు ఇక్కడి గ్రీన్‌ హెడ్‌ పట్టణ తీరంలోకి కొట్టుకువచ్చింది. అయితే, అది భారత రాకెట్‌కు సంబంధించిన వస్తువని ఆస్ట్రేలియా అంతరిక్ష సంస్థ (Australian Space Agency) తాజాగా వెల్లడించింది. ఉపగ్రహాలను నిర్ణీత కక్ష్యలోకి చేర్చే పోలార్ శాటిలైట్ లాంచ్ వెహికల్ (PSLV) మూడో దశకు సంబంధించిన శకలంగా నిర్ధారణకు వచ్చినట్లు తెలిపింది. ఐరాస అంతరిక్ష ఒప్పందాలకు లోబడి.. తదుపరి చర్యల విషయంలో భారత అంతరిక్ష పరిశోధన సంస్థ (ISRO) కలిసి పని చేస్తున్నట్లు పేర్కొంది.

ఆస్ట్రేలియా తీరంలో అంతుచిక్కని వస్తువు..!

జులై మూడో వారంలో ‘జురియన్‌ బే’లో ఈ భారీ వస్తువు వెలుగులోకి రాగా.. అది ఏంటనేది ఎవరికీ అంతుచిక్కలేదు. ఆ వస్తువుకు దూరంగా ఉండాలని స్థానికులను అధికారులు హెచ్చరించారు. అసలు అది ఎక్కడినుంచి వచ్చింది? ప్రమాదకరమా? కాదా? అని దర్యాప్తు ప్రారంభించారు. మరోవైపు.. దానికి సంబంధించిన ఫొటోలు, వీడియోలు నెట్టింట వైరల్‌గా మారాయి. అది 2014లో సముద్రంలో కూలిపోయిన మలేషియా విమానానికి సంబంధించిన శకలమేనని కొంతమంది చర్చించారు. ఆస్ట్రేలియా స్పేస్‌ ఏజెన్సీ మాత్రం.. ఏదైనా విదేశీ అంతరిక్ష ప్రయోగ వాహనానికి సంబంధించినది కావొచ్చని అంచనా వేసింది. తాజాగా అది భారత్‌కు చెందిన పీఎస్‌ఎల్‌వీ రాకెట్‌కు సంబంధించిన శకలమని నిర్ధారించారు.