Selfie: రైలుతో సెల్ఫీకి యత్నం.. ఒళ్లు గగుర్పొడిచే ప్రమాద దృశ్యాలు వైరల్‌

ఇంటర్నెట్‌ డెస్క్‌: ప్రపంచవ్యాప్తంగా ఎంతోమందిని ‘సెల్ఫీ మోజు’ బలి తీసుకుంటోంది. ప్రమాదకర స్టంట్లు, సాహసాల పేరుతో నిర్లక్ష్యంగా వ్యవహరిస్తూ అనేకమంది ప్రాణాలు కోల్పోతున్నారు. తాజాగా ఓ చారిత్రక రైలుతో సెల్ఫీ తీసుకునే క్రమంలో ఒక యువతి చనిపోయిన ఘటన మెక్సికో (Mexico)లో చోటుచేసుకొంది. ఒళ్లు గగుర్పొడిచేలా ఉన్న ఈ దృశ్యాలు సామాజిక మాధ్యమాల్లో వైరల్‌గా మారాయి. వివరాల్లోకి వెళ్లితే..

మెక్సికోలోని హిడాల్గో సమీపంలో ఆవిరి ఇంజిన్‌తో నడిచే రైలును చూసేందుకు అనేకమంది ఔత్సాహికులు ట్రాక్‌ల వద్ద గుమిగూడారు. రైలు సమీపిస్తుండడంతో ఫొటోలు, వీడియోలు తీసుకునేందుకు అంతా సిద్ధమయ్యారు. ఇంతలో ఓ యువతి పట్టాలకు మరింత దగ్గరగా వెళ్లి సెల్ఫీ తీసుకునేందుకు ప్రయత్నించింది. అంతలో వేగంగా దూసుకొచ్చిన రైలు ఆమెను ఢీకొట్టడంతో ఆ యువతి అక్కడికక్కడే ప్రాణాలు కోల్పోయింది.

మీపై దాడికి ఇతరులకు ఆయుధాలిస్తాం.. పాశ్చాత్య దేశాలకు పుతిన్‌ హెచ్చరిక!

దీనికి సంబంధించిన వీడియో నెట్టింట వైరల్‌గా మారింది. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు. యువతి మృతిపై స్పందించిన కెనడియన్‌ పసిఫిక్‌ కాన్సాస్‌ సిటీ (CPKC) విభాగం విచారం వ్యక్తంచేసింది. రైలు వచ్చే ముందు ట్రాక్‌లకు కనీసం 10 మీటర్ల దూరంలో ఉండాలని.. పట్టాలపై నిలబడకూడదంటూ ఓ ప్రకటనలో సూచించింది.