AP EAPCET 2024: ఏపీ ఈఏపీసెట్‌ సహా పలు పరీక్షల రీషెడ్యూల్‌.. కొత్త డేట్స్‌ ఇవే..

అమరావతి: సార్వత్రిక ఎన్నికల నేపథ్యంలో ఏపీలో పలు ప్రవేశ పరీక్షలను రీషెడ్యూల్‌ చేశారు. ఇంజినీరింగ్‌, వ్యవసాయ, ఫార్మసీ కోర్సుల్లో ప్రవేశాలకు నిర్వహించే ఉమ్మడి ప్రవేశ పరీక్ష ఏపీ ఈఏపీసెట్‌ (AP EAPCET 2024) పరీక్ష షెడ్యూల్‌లో మార్పు చేశారు. తొలుత నిర్ణయించిన ప్రకారం మే 13 నుంచి 19వరకు ఈ పరీక్షలు జరగాల్సి ఉండగా.. అగ్రికల్చర్‌ అండ్‌ ఫార్మసీ పరీక్ష మే 16, 17 తేదీల్లో; ఇంజినీరింగ్ పరీక్ష మే 18 (సెషన్‌-1), 19(సెషన్‌ -2), 20, 21, 22 తేదీల్లో నిర్వహించాలని ఉన్నత విద్యామండలి నిర్ణయించింది.  అలాగే, ఏపీ పీజీసెట్‌ పరీక్ష జూన్‌ 3 నుంచి 7 వరకు జరగాల్సి ఉండగా.. వాటిని జూన్‌ 10, 11, 12, 13, 14 తేదీల్లో నిర్వహించాలని నిర్ణయించారు. ఏపీలోని విశ్వవిద్యాలయాల్లో పీహెచ్‌డీ సీట్ల భర్తీకి నిర్వహించే ఆర్‌సెట్‌కు షెడ్యూల్‌ను ఖరారు చేశారు. ఈ పరీక్షలను మే 2 నుంచి 5 వరకు నిర్వహించనున్నట్లు ఏపీ ఉన్నత విద్యామండలి కార్యదర్శి ప్రొఫెసర్‌ నజీర్‌ అహ్మద్‌ ఓ ప్రకటనలో వెల్లడించారు.