TS Inter Results: తెలంగాణ ఇంటర్‌ ఫలితాలు.. బాలికలదే పైచేయి

హైదరాబాద్‌: తెలంగాణ ఇంటర్‌ ఫలితాలు (TS Inter Results) విడుదలయ్యాయి. నాంపల్లిలోని ఇంటర్‌ బోర్డు కార్యాలయంలో విద్యాశాఖ ముఖ్య కార్యదర్శి బుర్రా వెంకటేశం విడుదల చేశారు. మొత్తం 9.81లక్షల మంది ఈ పరీక్షలకు హాజరైనట్లు ఆయన తెలిపారు. ప్రథమ సంవత్సరంలో 60.01శాతం, ద్వితీయ సంవత్సరంలో 64.19 శాతం ఉత్తీర్ణత నమోదైంది. ఫస్టియర్‌లో 2.87లక్షల మంది, సెకండియర్‌లో 3.22లక్షల మంది విద్యార్థులు పాసయ్యారు.

ఫలితాల్లో బాలికలు పైచేయి సాధించారు. ఫస్టియర్‌లో 68.35 శాతం బాలికలు, 51.5 శాతం బాలురు ఉత్తీర్ణత సాధించారు. సెకండియర్‌లో 72.53 శాతం బాలికలు, 56.1 శాతం బాలురు పాసయ్యారు. మొదటి సంవత్సరం ఫలితాల్లో రంగారెడ్డి జిల్లా 71.07 శాతంతో ప్రథమ స్థానంలో.. మేడ్చల్‌ ద్వితీయ స్థానంలో నిలిచాయి. సెకండియర్‌లో ములుగు 81 శాతంతో మొదటి స్థానంలో.. మేడ్చల్‌ ద్వితీయ స్థానం దక్కించుకున్నాయి. బుధవారం సాయంత్రం 5 గంటల నుంచి అధికారిక వెబ్‌సైట్‌లో మార్కు షీట్లను డౌన్‌లోడ్‌ చేసుకోవచ్చని అధికారులు తెలిపారు.