మంచును తవ్వేయ్‌.... చేపను పట్టేయ్‌!

మంచును తవ్వేయ్‌.... చేపను పట్టేయ్‌!

అంతా ఉత్సాహంగా సిద్ధమవుతారు... స్వెట్టర్లు, మఫ్లర్లు ధరిస్తారు... సందడిగా చేపల వేటకు పోటీ పడతారు... ఒక్క చేపను పట్టినా కేరింతలు కొడతారు... ఎందుకంటే ఈ వేట మంచులో కాబట్టి!
చలికాలంలోచాలా చోట్ల మంచుపై స్కేటింగ్‌, మంచు శిల్పాలు చేయడం లాంటి కార్యక్రమాలు జరుగుతుంటాయి. కానీ ఓ దగ్గర వీటితోపాటు మంచులో చేపల వేట ఉంటుంది.
* ఐస్‌ ఫెస్టివల్‌ పేరిట దక్షిణ కొరియాలోని హ్వాచియన్‌ సాంచియోనియోలో ఏటా జనవరి 7 నుంచి 29 వరకు ఈ పండగ నిర్వహిస్తారు.
* నీళ్లలో చేపలు పట్టడం మనకు తెలుసు కానీ మంచులో ఏంటీ అనుకుంటున్నారా? ఇక్కడి గాంగ్వన్‌ డూ అనే ప్రావిన్స్‌లో చలికాలంలో గడ్డకట్టుకుపోయే నది ఉంటుంది. ఈ నది దగ్గరే ఈ పండగ జరుపుతుంటారు. మంచులో చేపలు పారదర్శకంగా కనిపిస్తుంటాయి. వీటిని చాకచక్యంగా పట్టుకోవడమే పోటీ. ఈ నదిలో ఉన్న చేపలే కాకుండా నిర్వాహకులు కూడా కొన్ని చేపల్ని ఉంచుతారు.
* మరి ఈ చేపల వేట ఎలా సాధ్యమవుతుంది? ఈ మంచునదిలో రెండు మీటర్ల లోతు వరకు అక్కడక్కడ పెద్ద పెద్ద రంధ్రాలు చేస్తారు. ఒకటో రెండో కాదు... ఈ రంధ్రాలు మొత్తం పన్నెండు వేలకుపైనే ఉంటాయి. వీటిల్లోంచి చేపల్ని కర్రల్లాంటి వాటితో బయటకు తీస్తారన్నమాట. ఎవరు ఎక్కువ చేపల్ని పడితే వారే విజేత.
* ఈ పండగనే ‘మౌంటెన్‌ ట్రౌట్‌ ఐస్‌ ఫెస్టివల్‌’ అని కూడా అంటారు.
* దీంతో పాటు ఐస్‌ స్కేటింగ్‌, నీటి కొలను ఏర్పాటు చేసి అందులో చేతులతో చేపలవేట వంటి ఇతర పోటీలూ పెడతారు
* 2003 నుంచి ప్రతి సంవత్సరం నిర్వహిస్తున్నారు. ఏటా ఈ ఫెస్టివల్‌ చూడ్డానికి పదిలక్షల మందికిపైనే సందర్శకులు వస్తుంటారు.