పెరుగుతున్న కొవిడ్‌ ఉద్ధృతి

కొత్తగా 6,996 మందికి వైరస్‌ 

ఈనాడు, అమరావతి: రాష్ట్రంలో కొవిడ్‌ కేసులు భారీగా వెలుగు చూస్తున్నాయి. 24 గంటల్లో కొత్తగా 6,996 కరోనా కేసులు నమోదయ్యాయి. సంక్రాంతి పండగకు చాలా మంది సొంతూర్లకు వెళ్లొచ్చారు. ఈ క్రమంలో వైరస్‌ వ్యాప్తి తీవ్రంగా జరిగినందువల్లే కేసులు అధిక సంఖ్యలో బయటపడుతున్నాయి. సోమవారం 4,018 (17.95%) కేసులు నమోదయ్యాయి. 24 గంటలు గడిచేసరికి కొత్త కేసులు 7 వేలకు చేరువలో రావడం ఆందోళన కలిగిస్తోంది. సోమవారం ఉదయం 9 నుంచి మంగళవారం ఉదయం 9 గంటల మధ్య 38,055 నమూనాలు పరీక్షించారు. పాజిటివిటీ రేటు 22.67%గా చేరుకోవడం గమనార్హం. విశాఖ, చిత్తూరు జిల్లాల్లో 48.46%, 35.21% చొప్పున పాజిటివిటీ రేటు నమోదైంది. కొవిడ్‌తో విశాఖ జిల్లాలో ఇద్దరు, చిత్తూరు, నెల్లూరు జిల్లాలో ఒక్కొక్కరు చొప్పున నలుగురు ప్రాణాలు విడిచారు. ప్రస్తుతం రాష్ట్రంలో 36,108 క్రియాశీలక కేసులు ఉన్నాయి.

తిరుపతిలో 100 మంది వైద్య సిబ్బందికి

ఈనాడు, తిరుపతి: తిరుపతిలోని రుయాలో కొవిడ్‌ బారినపడి 25 మంది వైద్యులు/సిబ్బంది ఆసుపత్రిలో చేరి చికిత్స తీసుకుంటుండగా... మరో 30 మంది వరకు హోం ఐసొలేషన్‌లో ఉన్నారు. స్విమ్స్‌లోనూ 50 మంది వైద్యులు/ఆసుపత్రి సిబ్బంది/వైద్య విద్యార్థులు కరోనా సోకి చికిత్స పొందుతున్నారు. సాధారణ రోగులకు, కొవిడ్‌ బాధితులకు సేవల్లో సమస్యలు తలెత్తకుండా జాగ్రత్తలు తీసుకుంటున్నట్లు స్విమ్స్‌ డైరెక్టర్‌ బి.వెంగమ్మ, రుయా సూపరింటెండెంట్‌ భారతి తెలిపారు.

* తెలంగాణలో మంగళవారం 2,983 పాజిటివ్‌ కేసులు నిర్ధారణ అయ్యాయి. 7 నెలల తర్వాత ఇంత భారీ సంఖ్యలో కేసులు నమోదవడం ఇదే తొలిసారి. మొత్తం బాధితుల సంఖ్య 7,14,639కి పెరిగింది. ప్రజారోగ్య సంచాలకుడు డాక్టర్‌ జి.శ్రీనివాసరావు కొవిడ్‌ బారినపడ్డారు.  మంగళవారం ఒక్కరోజే రాష్ట్రవ్యాప్తంగా 1,07,904 నమూనాలను పరీక్షించారు.