ఆలయం నుంచి బయటకెళ్లు.. దళిత సర్పంచిని అవమానించిన వైకాపా నాయకులు

జూపాడుబంగ్లా, న్యూస్‌టుడే: నంద్యాల జిల్లా జూపాడుబంగ్లా మండలం పారుమంచాల గ్రామంలోని రామాలయానికి వెళ్లిన తనను వైకాపా నాయకులు లోకేశ్వరరెడ్డి, జగదీశ్వరరెడ్డిలు అవమానించారంటూ అదే పార్టీకి చెందిన గ్రామ దళిత సర్పంచి మాధవరం ప్రకాశం ఆదివారం పోలీసులకు ఫిర్యాదు చేశారు. ఆలయంలో శనివారం పూజా కార్యక్రమాలు, హరికథా కాలక్షేపం నిర్వహించారు. వాటిని తిలకించేందుకు వెళ్లిన తనను బయటకెళ్లు అంటూ అవమానించారని బాధితుడు పేర్కొన్నారు. దళితుడిని కావడంతోనే తనను బయటకు వెళ్లమన్నారని వాపోయారు. దళిత సర్పంచిని అవమానించిన వారిపై చర్యలు తీసుకోవాలని ఆయన డిమాండ్‌ చేశారు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.