Adani stocks: అదానీ సంపద.. గంటల్లో రూ.లక్ష కోట్లు ఆవిరి

ఇంటర్నెట్‌ డెస్క్‌: సోలార్‌ పవర్‌ కాంట్రాక్టులు దక్కించుకోవడానికి పలు రాష్ట్రాల అధికారులకు అదానీ గ్రూప్‌ లంచం ఇవ్వజూపిందంటూ అభియోగాలు రావడం ఆ కంపెనీ షేర్లపై భారీ ప్రభావం చూపింది. ట్రేడింగ్‌ ప్రారంభమైన కొద్దిసేపటికే అదానీ గ్రూప్‌నకు చెందిన కంపెనీల షేర్లు భారీ స్థాయిలో పతనమయ్యాయి. గౌతమ్ అదానీ సంపద కూడా ఒకే రోజు 12 బిలియన్‌ డాలర్లు (రూ.లక్ష కోట్లు) ఆవిరయ్యింది. గతేడాది హిండెన్‌బర్గ్‌ నివేదిక తర్వాత ఈ స్థాయిలో పడిపోవడం ఇదే తొలిసారి.

అదానీ గ్రూప్‌లోని పలు కంపెనీల షేర్లు భారీగా పతనమయ్యాయి. అత్యధికంగా  అదానీ ఎంటర్‌ ప్రైజెస్‌ షేర్ల విలువ 23% పడిపోగా.. అదానీ ఎనర్జీ సొల్యూషన్స్‌ 20% పతనమయ్యాయి. అదానీ గ్రీన్‌ ఎనర్జీ 18%, అదానీ పోర్ట్స్‌ అండ్‌ సెజ్‌ 13%, అదానీ టోటల్‌ గ్యాస్‌ 10%, అదానీ విల్మార్‌ 10%, అదానీ సిమెంట్స్‌ 12%, అదానీ పవర్‌ 9%, ఏసీసీ షేర్ల 7.92% మేర నష్టపోయాయి. ఆయా కంపెనీ మార్కెట్‌ విలువ దాదాపు రూ.2.5 లక్షల కోట్ల మేర క్షీణించింది.

అదానీని అరెస్ట్ చేయాలి.. సెబీ చీఫ్‌ను విచారించాలి: రాహుల్‌ గాంధీ డిమాండ్‌

ప్రపంచ కుబేరుల్లో ఒకరుగా ఉన్న గౌతమ్‌ అదానీ సంపద విలువ 70 బిలియన్‌ డాలర్లుగా అంచనా. అదానీ గ్రూప్‌పై వచ్చిన ఆరోపణలతో ఒకేరోజు దాదాపు 12.1బిలియన్‌ డాలర్లు నష్టపోయి 57.7బిలియన్‌ డాలర్లకు పడిపోయింది. దీంతో ఫోర్బ్స్‌ బిలియనీర్‌ ఇండెక్స్‌ జాబితాలో 22 స్థానంలో కొనసాగిన ఆయన.. ప్రస్తుతం 25వ స్థానానికి పడిపోయారు.