AU Small Finance Bank: ఒకే రోజు 51 ఏయూ స్మాల్‌ ఫైనాన్స్‌ బ్యాంక్‌ శాఖలు ప్రారంభం

AU Small Finance Bank | దిల్లీ: దేశవ్యాప్తంగా ఒకేరోజు 51 కొత్త బ్యాంకు శాఖలను ప్రారంభించనున్నట్లు ఏయూ స్మాల్ ఫైనాన్స్‌ బ్యాంకు ప్రకటించింది. ఇటీవల యూనివర్సల్ బ్యాంకుగా మారేందుకు ప్రాథమిక అనుమతి పొందిన సందర్భంగా ఈ నిర్ణయం తీసుకుంది. ఆగస్టు 15న దేశ 79వ స్వాతంత్ర్య దినోత్సవాన్ని పురస్కరించుకుని ఈ కొత్త శాఖలను ప్రారంభించనున్నట్లు ఓ ప్రకటనలో పేర్కొంది. ఇందులో భాగంగా 30 లయబిలిటీ బ్రాంచులు, 21 మైక్రో ఫైనాన్స్‌ & ఇన్‌క్లూజివ్‌ బ్యాంకింగ్ (ఎంఎఫ్‌ఐబీ) బ్రాంచ్‌లను ప్రారంభించనుంది. పశ్చిమ బెంగాల్‌, గుజరాత్, తెలంగాణ, మధ్యప్రదేశ్‌, ఒడిశా, రాజస్థాన్‌, తమిళనాడు వంటి రాష్ట్రాల్లోని ప్రధాన నగరాలు/ పట్టణాల్లో వీటిని ఏర్పాటు చేయనున్నట్లు తెలిపింది. ఈ శాఖల్లో డిపాజిట్లు, లావాదేవీలు, కలెక్షన్‌ సొల్యూషన్స్, ట్రేడ్ ఫైనాన్స్‌, బీమా, పెట్టుబడులు, ఆధునిక డిజిటల్‌ బ్యాంకింగ్‌ వంటి సమగ్ర ఆర్థిక సేవలు అందుబాటులో ఉంటాయని తెలిపింది. మైక్రో ఎంటర్‌ప్రైజ్‌లు, ఆర్థికంగా వెనకబడిన వర్గాలకు ఎంఎఫ్‌ఐబీ బ్రాంచ్‌లు అదనంగా ప్రత్యేక సహాయాన్ని అందిస్తాయని పేర్కొంది.