Bharti Airtel: భారతీ ఎయిర్‌టెల్‌ లాభం రూ.1,341 కోట్లు

దిల్లీ: ప్రముఖ టెలికాం సంస్థ భారతీ ఎయిర్‌టెల్‌ (Bharti Airtel) రెండో త్రైమాసిక ఫలితాలను (Q2 results) మంగళవారం ప్రకటించింది. సెప్టెంబరుతో ముగిసిన త్రైమాసికంలో ఏకీకృత నికర లాభం 37.5 శాతం తగ్గి రూ.1,341 కోట్లుగా నమోదైంది. గతేడాది ఇదే సమయంలో కంపెనీ లాభం రూ.2,145 కోట్లుగా టెలికాం సంస్థ నివేదించింది.  ఆదాయంలో మాత్రం 7.3 శాతం వృద్ధితో రూ.37,044 కోట్లుగా నమోదు చేసింది.

వాట్సప్‌లో భద్రతాపరమైన ఫీచర్‌.. ఆ వివరాలు ట్రాక్‌ చేయలేరు!

‘సెప్టెంబరుతో ముగిసిన త్రైమాసికంలో ఆదాయంలో మెరుగైన వృద్ధిని నమోదు చేసుకున్నాం. నైజీరియా కరెన్సీ నైరా విలువ తగ్గింపు మా లాభంపై ప్రభావం చూపింది’ అని భారతీ ఎయిర్‌టెల్ ఎండీ గోపాల్ విట్టల్ తెలిపారు. సెప్టెంబరుతో ముగిసిన త్రైమాసికంలో కొత్తగా 7.7 మిలియన్ల 4జీ/5జీ నెట్‌ సబ్‌స్క్రైబర్లు పెరిగినట్లు ఎయిర్‌టెల్‌ తెలిపింది. టెలికాం కంపెనీలు కీలక కొలమానంగా భావించే.. ARPU (వ్యక్తి నుంచి వచ్చే సగటు ఆదాయం) రూ.203 కు చేరినట్లు కంపెనీ పేర్కొంది. ఫలితాల నేపథ్యంలో మార్కెట్‌ ముగిసే సమయానికి కంపెనీ షేరు విలువ 1.32శాతం క్షీణించి రూ.914.05 వద్ద స్థిరపడింది.