Bharti Hexacom IPO: భారతీ హెగ్జాకామ్‌ ఐపీఓ ప్రారంభం.. పూర్తి వివరాలివే..

దిల్లీ: ప్రముఖ టెలికాం కంపెనీ భారతీ ఎయిర్‌టెల్‌ అనుబంధ సంస్థ ‘భారతీ హెగ్జాకామ్‌’ ఐపీఓ (Bharti Hexacom IPO) బుధవారం ప్రారంభమైంది. ఈ నెల 5 వరకు షేర్లకు బిడ్లు దాఖలు చేయొచ్చు. షేరు ధరల శ్రేణిని రూ.542 - 570గా కంపెనీ నిర్ణయించింది. గరిష్ఠ ధర వద్ద రూ.4,275 కోట్లు సమీకరించనుంది. రిటైల్‌ మదుపర్లు కనీసం రూ.14,820తో 26 షేర్లకు (ఒక లాట్‌) బిడ్లు దాఖలు చేయాల్సి ఉంటుంది.

2024-25 ఆర్థిక సంవత్సరంలో భారతీ హెగ్జాకామ్‌ ఐపీఓనే (IPO) మొదటిది. ఇది పూర్తిగా ఆఫర్‌ ఫర్‌ సేల్‌ కింద జరగనుంది. దీంతో ఐపీఓ ద్వారా సమీకరించే నిధులేమీ కంపెనీకి చెందబోవు. ఓఎఫ్‌ఎస్‌లో భాగంగా 7.5 కోట్ల షేర్లను వాటాదారు ‘టెలికమ్యూనికేషన్స్‌ కన్సల్టెంట్స్‌ ఇండియా’ (టీసీఐఎల్‌) విక్రయించనుంది. ఈ సంస్థలో 70 శాతం వాటా భారతీ ఎయిర్‌టెల్‌కు, 30 శాతం టీసీఐఎల్‌కు ఉన్నాయి.

ఐపీఓలో 75 శాతం షేర్లను అర్హతగల సంస్థాగత కొనుగోలుదారులకు (QIBs), 15 శాతం సంస్థాగతేతర మదుపర్లకు (NIIs), 10 శాతం రిటైల్‌ ఇన్వెస్టర్లకు కేటాయించారు. 2023 మార్చి 31తో ముగిసిన ఆర్థిక సంవత్సరంలో కంపెనీ ఆదాయం రూ.6,719.20 కోట్లుగా, పన్నేతర లాభం రూ.549 కోట్లుగా నమోదైంది.

రాజస్థాన్‌, ఈశాన్య రాష్ట్రాల టెలికాం సర్కిళ్లలో భారతీ హెగ్జాకామ్‌ మొబైల్‌, ఫిక్స్‌డ్‌ లైన్‌ టెలిఫోన్‌, బ్రాడ్‌బ్యాండ్‌ సేవలు అందిస్తోంది. ఐపీఓ బుక్‌ రన్నింగ్‌ లీడ్‌ మేనేజర్లుగా ఎస్‌బీఐ క్యాపిటల్‌ మార్కెట్స్‌, యాక్సిస్‌ క్యాపిటల్‌, బీఓబీ క్యాపిటల్‌ మార్కెట్స్‌, ఐసీఐసీఐ సెక్యూరిటీస్‌, ఐఐఎఫ్‌ఎల్‌ సెక్యూరిటీస్‌ వ్యవహరిస్తున్నాయి. ఐపీఓ అనంతరం కంపెనీ షేర్లు బీఎస్‌ఈ, ఎన్‌ఎస్‌ఈలలో నమోదు కానున్నాయి.

ఐపీఓ వివరాలు సంక్షిప్తంగా..

• ఐపీఓ తేదీలు: ఏప్రిల్‌ 03-05
• ధరల శ్రేణి: రూ.542-570
• షేరు ముఖ విలువ: రూ.5
• కనీసం కొనాల్సిన షేర్ల సంఖ్య: 26 (ఒక లాట్‌)
• కనీస పెట్టుబడి: రూ.14,820
• అలాట్‌మెంట్ తేదీ: ఏప్రిల్‌ 8
• రిఫండ్‌ తేదీ: ఏప్రిల్‌ 10
• లిస్టింగ్‌ తేదీ: ఏప్రిల్‌ 12

(గమనిక: ఐపీఓలో పెట్టుబడి నష్టభయంతో కూడుకున్న వ్యవహారం. పై వివరాలు కేవలం సమాచారం కోసం మాత్రమే. ఐపీఓలో మదుపు చేయడం పూర్తిగా మీ వ్యక్తిగత నిర్ణయం.)