Google Gemini: ‘జెమిని’.. గూగుల్‌ ఏఐ మోడల్‌కు ఆ పేరెలా వచ్చింది?

ఇంటర్నెట్‌ డెస్క్‌: అధునాతన సామర్థ్యాలతో కృత్రిమ మేధ మోడళ్లు తరచూ వార్తల్లో నిలుస్తున్నాయి. గూగుల్‌ జెమిని (Google Gemini) అందులో ఒకటి. ఇటీవలే దీన్ని మరింత ఆధునికీకరిస్తూ కంపెనీ కొత్త ఫీచర్లను పరిచయం చేసింది. ఇంతకీ గూగుల్‌ తమ ఏఐ మోడల్‌కు జెమిని అనే పేరు ఎందుకు ఎంచుకొంది?

ఇటీవల ఓ బ్లాగ్‌పోస్ట్‌లో జెమిని అనే పేరు వెనకాల ఉన్న కసరత్తును గూగుల్‌ వివరించింది. ‘‘శనిగ్రహం చుట్టూ తిరిగే ఉపగ్రహం ‘టైటన్‌’ పేరును తొలుత కొంతమంది సూచించారు. అది అందరికీ ఆకర్షణీయంగా అనిపించలేదు. కానీ, అంతరిక్ష వృత్తాంతంతోనే పేరు ఎంచుకోవాలనే స్ఫూర్తి దాన్నుంచి తీసుకున్నాం’’ అని జెమిని కో-టెక్నికల్‌ లీడ్‌ జెఫ్‌ డీన్‌ వెల్లడించారు.

‘‘ఈ క్రమంలో వివిధ పేర్లను పరిశీలిస్తుండగా జెమిని (Google Gemini) అనే పేరు తెరపైకి వచ్చింది. ఆ పదానికి కవలలు అని అర్థం. ఇది అందరికీ నచ్చింది. దీనికి రెండు కారణాలు ఉన్నాయి. శక్తిమంతమైన ఏఐ మోడల్‌ సృష్టి కోసం గూగుల్‌లోని డీప్‌మైండ్‌, బ్రెయిన్‌ పరిశోధన బృందాలను విలీనం చేశాం. ఈ రెండూ సమష్టిగా పనిచేస్తూ గ్రీకు పౌరాణిక కవలలు క్యాస్టర్, పోలక్స్‌తో కూడిన నక్షత్రరాశి జెమినీని ప్రతిబింబించాయి. మరో కారణం.. జ్యోతిషశాస్త్రం ప్రకారం అనుకూలత, వివిధ కోణాల నుంచి విషయాలను విశ్లేషించే సామర్థ్యానికి జెమిని ప్రసిద్ధి. మేం తీసుకురావాలనుకున్న ఏఐ మోడల్‌ పనితీరుకు ఇది దగ్గరగా ఉంది’’ అని బ్లాగ్‌పోస్ట్‌లో గూగుల్‌ వివరించింది.

ఈ పేరును ఖరారు చేయడానికి మరో అంశం కూడా తమకు స్ఫూర్తినిచ్చినట్లు గూగుల్‌ (Google) వెల్లడించింది. చంద్రుడిపై కాలు మోపేందుకు 1960ల్లో నాసా చేపట్టిన ప్రాజెక్టుకు కావాల్సిన సాంకేతికతల ప్రయోగాలను జెమిని పేరిటే నిర్వహించినట్లు గుర్తు చేసింది. ఆ మిషన్‌ అంతరిక్షయాన విప్లవానికి నాంది పలికినట్లే.. ఏఐలోనూ తమ మోడల్‌ కొత్త శకానికి శ్రీకారం చుట్టాలని ఆకాంక్షించామని తెలిపింది.