Tech Tip: జీ-మెయిల్‌లో లార్జ్‌ ఫైల్స్‌ను సెండ్‌ చేయడం ఎలా?

Gmail | ఇంటర్నెట్‌డెస్క్‌: నిత్యం వినియోగించే ఇ-మెయిల్‌ సేవల్లో జీ-మెయిల్‌ (Gmail) ముందు వరుసలో ఉంటుంది. గూగుల్‌కు చెందిన ఈ సేవల్ని ప్రపంచవ్యాప్తంగా విస్తృతంగా వినియోగిస్తుంటారు. క్వాలిటీ మిస్‌ కాకుండా ఫొటోలు పంపాలన్నా, ముఖ్యమైన ఫైల్స్‌, డాక్యుమెంట్లు సెండ్‌ చేయాలన్నా జీ- మెయిల్‌నే ఎక్కువమంది వాడుతుంటారు. అయితే 25MB కంటే ఎక్కువ స్టోరేజ్‌ ఉన్న ఫైల్స్‌ను పంపేందుకు ప్రయత్నిస్తే జీ- మెయిల్‌ మిమ్మల్ని అడ్డుకుంటుంది. ఇలాంటి సమస్య తలెత్తకుండా సులువుగా లార్జ్‌ డేటా డాక్యుమెంట్లు పంపేందుకు ఓ పరిష్కారం ఉంది.

ఎలా సెండ్‌ చేయాలి?

• ముందుగా మీరు పంపించాలనుకుంటున్న ఫైల్‌, వీడియో ఏదైనా గూగుల్‌ డ్రైవ్‌లో అప్‌లోడ్ చేయాలి.
• జీ- మెయిల్‌ పంపే సమయంలో కుడివైపు స్క్రీన్‌పై కనిపించే డ్రైవ్‌ ఐకాన్‌ ఎంచుకోవాలి. అదే డెస్క్‌టాప్‌లో అయితే ఈ ఐకాన్‌ కింద ఉంటుంది.
• ఐకాన్‌ను క్లిక్‌ చేయగానే రెండు ఆప్షన్లు కనిపిస్తాయి. అందులో కనిపించే ‘Insert from Drive’ ఆప్షన్‌పై క్లిక్‌ చేసి ‘My Drive’ను ఎంచుకోవాలి.
• వెంటనే మీరు గూగుల్‌ డ్రైవ్‌లో అటాచ్‌ చేసిన ఫైల్స్‌ దర్శనమిస్తాయి. అందులో పంపించాలనుకుంటున్న లార్జ్‌ ఫైల్‌ని ఎంచుకొని ‘Select’పై క్లిక్‌ చేయాలి.
• మీరు సెలెక్ట్‌ చేసుకున్న ఫైల్‌కు సంబంధించిన లింక్‌ను గూగుల్‌ క్రియేట్‌ చేసి ఆటోమెటిక్‌గా ఇ-మెయిల్‌కి పంపిస్తుంది.
• మెయిల్‌ సెండ్‌ చేసే ముందు లింక్‌ను కేవలం అందుకున్నవారు మాత్రమే యాక్సెస్‌ చేయాలా?ఎవరైనా యాక్సెస్‌ చేయొచ్చా? అనే ఆప్షన్లు కనిపిస్తాయి. మీకు నచ్చిన దాన్ని ఎంచుకుని మెయిల్‌ సెండ్‌ చేయొచ్చు.