Jio AirFiber: జియో ఎయిర్‌ఫైబర్‌లోనూ డేటా బూస్టర్‌ ప్లాన్‌.. ధర ఎంతంటే?

Jio AirFiber | ఇంటర్నెట్‌ డెస్క్‌: ఇటీవలే అందుబాటులోకి వచ్చిన 5జీ ఆధారిత ‘జియో ఎయిర్‌ఫైబర్‌ (Jio AirFiber)’ వైర్‌లెస్‌ బ్రాడ్‌బ్యాండ్‌లో కంపెనీ మరో కొత్త ప్లాన్‌ను తీసుకొచ్చింది. ఇది డేటా బూస్టర్‌. దీని ధర రూ.401. దీన్ని యాక్టివేట్‌ చేసుకోవాలంటే కచ్చితంగా బేస్‌ ప్లాన్‌కు సబ్‌స్క్రైబ్‌ అయ్యి ఉండాల్సిందే. రెగ్యులర్‌, మ్యాక్స్ పేరిట జియో ఎయిర్‌ఫైబర్‌ మొత్తం ఆరు బేసిక్‌ ప్లాన్లను అందిస్తున్న విషయం తెలిసిందే. కనెక్షన్‌ యాక్టివ్‌గా ఉండాలంటే వీటిలో ఏదో ఒక దాన్ని సబ్‌స్క్రైబ్‌ చేసుకోవాలి.

👉 Follow EENADU WhatsApp Channel

తాజాగా తీసుకొచ్చిన రూ.401 డేటా బూస్టర్‌ ప్లాన్‌తో అదనంగా 1టీబీ డేటా లభిస్తుంది. దీని వ్యాలిడిటీ బేసిక్‌ ప్లాన్‌తో పాటే ముగుస్తుంది. అంటే కొత్త బిల్లింగ్‌ సైకిల్‌ ప్రారంభమైతే.. డేటా బూస్టర్‌ ప్లాన్‌ ముగిసినట్లే. అందులో మిగిలిన డేటా ఇక పోయినట్లే. ఒకవేళ ఎక్స్‌ట్రా డేటా కావాలంటే కొత్తగా మళ్లీ డేటా బూస్టర్‌ తీసుకోవాలి. వాస్తవానికి ఈ డేటా బూస్టర్‌ ప్లాన్‌ చాలా తక్కువ మందికే అవసరం కావొచ్చు. బేసిక్‌ ప్లాన్‌లోనే యూజర్లకు నెలకు 3.3 టీబీ డేటా లభిస్తుంది. 100 ఎంబీపీఎస్‌ లేదా అంతకంటే తక్కువ స్పీడ్‌తో కూడిన ప్లాన్లను యాక్టివేట్‌ చేసుకునేవారికి అసలు అదనపు డేటా అవసరమయ్యే అవకాశమే ఉండకపోవచ్చు.

జియో ఎయిర్‌ఫైబర్‌ దీపావళి నుంచి అందుబాటులోకి వచ్చింది. ప్రస్తుతం దేశవ్యాప్తంగా 494 పట్టణాలకు దీని సేవలు విస్తరించాయి. రెండు తెలుగు రాష్ట్రాల్లో దాదాపు అన్ని ప్రధాన నగరాల్లో సేవలు అందుబాటులో ఉన్నాయి.