Bank of Baroda: బ్యాంక్‌ ఆఫ్‌ బరోడాకు ఊరట.. యాప్‌పై ఆంక్షలు ఎత్తివేసిన ఆర్‌బీఐ

Bank of Baroda | ముంబయి: ప్రభుత్వ రంగానికి చెందిన బ్యాంక్‌ ఆఫ్‌ బరోడాకు (Bank of Baroda) ఊరట లభించింది. బ్యాంక్‌కు చెందిన మొబైల్‌ అప్లికేషన్‌ బీఓబీ వరల్డ్‌పై విధించిన ఆంక్షలను రిజర్వ్‌ బ్యాంక్‌ ఆఫ్‌ ఇండియా (RBI) ఎత్తివేసింది. కొత్త కస్టమర్లను చేర్చుకోవడానికి అనుమతించిందని ఆ బ్యాంక్‌ బుధవారం పేర్కొంది. మొబైల్‌ అప్లికేషన్‌లో కొన్ని లోపాలు బయటపడడంతో కొత్త కస్టమర్లను చేర్చుకోవడంపై ఆర్‌బీఐ ఆంక్షలు విధించిన సంగతి తెలిసిందే.

దాదాపు 7 నెలలుగా తమ మొబైల్‌ అప్లికేషన్‌పై అమల్లో ఉన్న ఆంక్షలను ఆర్‌బీఐ ఎత్తివేసిందని బ్యాంక్‌ ఆఫ్‌ బరోడా తాజాగా తన రెగ్యులేటరీ ఫైలింగ్‌లో తెలిపింది. తక్షణమే ఈ నిర్ణయం అమల్లోకి వచ్చిందని పేర్కొంది. దీంతో కొత్త కస్టమర్లను చేర్చుకోవడానికి ఉన్న ఇబ్బందులు తొలగిపోయాయని తెలిపింది. ఇకపై ఆర్‌బీఐ నిర్దేశించిన మార్గదర్శకాలకు అనుగుణంగా నడుచుకుంటామని పేర్కొంది.