Realme 11 Pro: 200MP కెమెరా..5000mAh బ్యాటరీతో రియల్‌మీ 11ప్రో ఫోన్లు

Realme 11 Pro | ఇంటర్నెట్‌ డెస్క్‌: రియల్‌మీ 11 ప్రో సిరీస్‌ (Realme 11 Pro Series) స్మార్ట్‌ఫోన్‌లు భారత్‌లో విడుదలయ్యాయి. రియల్‌మీ 11 ప్రో 5G, 11 ప్రో+ 5G (Realme 11 Pro+) పేరిట వస్తున్న ఈ ఫోన్లు మే 10నే చైనా మార్కెట్‌లోకి వచ్చేశాయి. వీటిలో 6.7 ఫుల్‌ హెచ్‌డీ+ తెర, ఆక్టాకోర్‌ 6nm మీడియాటెక్‌ డైమెన్సిటీ 7050 ప్రాసెసర్‌ను ఇస్తున్నారు. ఇవి మూడు రంగుల్లో అందుబాటులో ఉన్నాయి.

రియల్‌మీ 11 ప్రో సిరీస్‌ ధర..

రియల్‌మీ 11 ప్రో 5జీ 8GB ర్యామ్‌ + 128GB స్టోరేజ్ వేరియంట్‌ ధర రూ.23,999. దీంట్లోనే 8GB + 256GB వేరియంట్‌ ధర రూ.24,999. 12GB + 256GB వేరియంట్‌ ధర రూ.27,999. జూన్‌ 16 మధ్యాహ్నం నుంచి ఇది అమెజాన్‌, రియల్‌మీ వెబ్‌సైట్‌, కొన్ని ఎంపిక చేసిన రిటైల్‌ స్టోర్లలో విక్రయానికి అందుబాటులోకి రానుంది.

మరోవైపు రియల్‌మీ 11 ప్రో+ 5Gలో 8GB + 256GB ధర రూ.27,999. 12GB + 256GB ధర రూ.29,999. ఈ ఫోన్‌ జూన్‌ 15 మధ్యాహ్నం నుంచి అమెజాన్‌, రియల్‌మీ వెబ్‌సైట్‌ సహా ఎంపిక చేసిన స్టోర్లలో అందుబాటులోకి వస్తాయి. ఎర్లీ యాక్సెస్‌ సేల్‌ కింద వీటిని జూన్‌ 8న సాయంత్రం 6-8 గంటల మధ్య విక్రయానికి ఉంచుతున్నారు. ఈ సమయంలో ఫోన్‌ కొన్నవారికి రూ.2,000 రాయితీ లభించనుంది. మరోవైపు వివిధ బ్యాంకు కార్డులపై రియల్‌మీ ప్రో+ 5జీ కొనుగోలు చేసేవారికి రూ.2,000, రియల్‌మీ ప్రో+పై రూ.1,500 వరకు రాయితీ ఇస్తున్నట్లు కంపెనీ తెలిపింది.

రియల్‌మీ 11 ప్రో సిరీస్‌ ఫీచర్లు..

రియల్‌మీ 11 ప్రో (Realme 11 Pro), రియల్‌మీ 11 ప్రో+ (Realme 11 Pro+) ఫోన్లు ఆండ్రాయిడ్‌ 13 ఆధారిత రియల్‌మీ యూఐ4.0 ఓఎస్‌తో వస్తున్నాయి. రెండింటిలోనూ 6.7 అంగుళాల ఫుల్‌ హెచ్‌డీ+ (1,080x2,412 pixels) కర్వ్‌డ్‌ తెరను ఇస్తున్నారు. 6ఎన్‌ఎం ఆక్టాకోర్‌ డైమెన్సిటీ 7050 ప్రాసెసర్‌ ఉంది. 11 ప్రో ఫోన్‌లో 100 మెగాపిక్సెల్‌ కెమెరాను ఇస్తున్నారు. 11 ప్రో+లో 200 మెగాపిక్సెల్‌ కెమెరాను పొందుపర్చారు. వీటిలో వరుసగా 16 మెగాపిక్సెల్‌, 32 మెగాపిక్సెల్‌ సెల్ఫీ కెమెరాలు ఉన్నాయి. ఈ రెండింటిలోనూ 5,000mAh బ్యాటరీని ఇస్తున్నారు.