Redmi A3: రెడ్‌మీ నుంచి ఎంట్రీ లెవల్‌ స్మార్ట్‌ఫోన్‌.. ఫీచర్లు ఇవే..!

Redmi A3 launched | ఇంటర్నెట్‌ డెస్క్‌: ఎంట్రీ లెవల్‌లో స్మార్ట్‌ఫోన్‌ కోసం చూస్తున్న వారికి రెడ్‌మీ (Redmi) ఓ కొత్త ఫోన్‌ను అందుబాటులోకి తెచ్చింది. రెడ్‌మీ ఏ2కి కొనసాగింపుగా ఏ3ని (Redmi A3) తీసుకొచ్చింది. ఆండ్రాయిడ్‌ గో (Go edition) ఎడిషన్‌తో వస్తున్న ఈ స్మార్ట్‌ మూడు కలర్‌ ఆప్షన్లు, మూడు స్టోరేజీ వేరియంట్లలో లభ్యమవుతుంది. ఈ ఫోన్‌ ధర, ఫీచర్లు, ఇతర వివరాలు ఇప్పుడు చూద్దాం..

రెడ్‌మీ ఏ3 (Redmi A3) 3జీబీ+64జీబీ వేరియంట్‌ ధర రూ.7,299గా కంపెనీ నిర్ణయించింది. 4జీబీ +128 జీబీ వేరియంట్‌ రూ.8,299కు, 6జీబీ+128జీబీ వేరియంట్‌ రూ.9,299కు లభ్యమవుతున్నాయి. మిడ్‌నైట్‌ బ్లాక్‌, లేక్‌ బ్లూ, ఆలివ్‌ గ్రీన్‌ రంగుల్లో లభిస్తుంది. ఫిబ్రవరి 23 నుంచి విక్రయాలు ప్రారంభం కానున్నాయి. ఫ్లిప్‌కార్ట్, ఎంఐ.కామ్‌, షావోమీ రిటైల్‌ స్టోర్లలో ఈ ఫోన్లు అందుబాటులో ఉంటాయి.

ఇక ఈ ఫోన్‌ ఫీచర్ల విషయానికొస్తే.. ఇది ఆండ్రాయిడ్‌ 13 గో ఎడిషన్‌తో పనిచేస్తుంది. 6.71 అంగుళాల హెచ్‌డీ+ డిస్‌ప్లే ఇచ్చారు. 90Hz రిఫ్రెష్‌ రేటుతో ఈ స్క్రీన్‌ పనిచేస్తుంది. వాటర్‌ డ్రాప్‌ స్టయిల్‌ నాచ్‌తో కార్నింగ్‌ గొరిల్లా గ్లాస్‌ 3 ప్రొటెక్షన్‌తో వస్తోంది. ఆక్టాకోర్‌ మీడియాటెక్‌ హీలియో జీ36 ప్రాసెసర్‌తో వస్తోంది. 12 జీబీ వరకు పెంచుకునేలా వర్చువల్‌ ర్యామ్‌ సదుపాయం ఉంది. వెనుకవైపు 8 ఎంపీ ఏఐ డ్యూయల్‌ కెమెరా, ముందువైపు 5 ఎంపీ కెమెరా ఇచ్చారు. 4జీ కనెక్టివిటీ, బ్లూటూత్‌ 5.0, సైడ్‌మౌంటెడ్‌ ఫింగర్‌ ప్రింట్‌ సెన్సర్‌, 3.5 ఎంఎం ఆడియో జాక్‌ వంటి ఫీచర్లు ఉన్నాయి. 5000 ఎంఏహెచ్‌ బ్యాటరీ, 10W ఫాస్ట్‌ ఛార్జింగ్‌ సదుపాయం ఉంది.