iPhone: ఐఫోన్‌లో ‘స్టోలెన్‌ డివైజ్‌ ప్రొటెక్షన్‌’.. పాస్‌కోడ్‌ తెలిసినా వాడలేరు!

iPhone | ఇంటర్నెట్‌డెస్క్‌: పెద్ద బహిరంగ సభ జరుగుతోంది. పాకెట్‌లో ఉన్న ఐఫోన్‌ను మీరు పదే పదే లాక్‌ తీసి యాక్సెస్‌ చేస్తుంటారు. అలాంటి సందర్భంలో అప్పటికే మీ ఫోన్‌పై కన్నేసిన కేటుగాడికి పాస్‌వర్డ్ తెలుసుకోవడం పెద్ద విషయం కాదు. ఆ సభలో లీనమైపోయిన దశలో ఫోన్‌ కొట్టేస్తే.. ఫోన్‌ను తెరవడం, అందులోని డేటాను చెరిపేయడం పెద్ద విషయం కాదు. పాస్‌వర్డ్‌ తెలీకపోతేనే ఏమీ చేయలేని ఇప్పటి పరిస్థితుల్లో.. సర్వం తెలిశాక ఇలాంటి ఉదంతం జరిగితే అడ్డుకోవడం కష్టమే. ఇలాంటి పరిస్థితుల్లోనూ మీ ఐఫోన్‌/ ఐప్యాడ్‌ డివైజులను దొంగతనాల నుంచి రక్షించుకోవచ్చంటోంది యాపిల్‌. ఇందుకోసం కొత్తగా ‘స్టోలెన్‌ డివైజ్‌ ప్రొటెక్షన్‌’ పేరిట కొత్త సదుపాయాన్ని తీసుకొచ్చింది.

సాధారణంగా దొంగిలించిన ఫోన్‌ పాస్‌వర్డ్‌ తెలిసినప్పుడు ఫోన్‌లోని డేటాను తొలగించి దాన్ని విక్రయించాలని చూస్తుంటారు. కానీ యాపిల్‌ తీసుకొచ్చిన కొత్త ఫీచర్‌తో దీన్ని అడ్డుకోవచ్చు. యాపిల్‌ తన లేటెస్ట్‌ ఐఓఎస్‌ వెర్షన్‌ 17.3లో ఈ ఫీచర్‌ అందుబాటులోకి తీసుకొచ్చింది. సెట్టింగ్స్‌లోకి వెళ్లి దీన్ని ఆన్‌ చేసుకోవచ్చు. ‘స్టోలెన్ డివైస్ ప్రొటెక్షన్’ ఆన్‌ చేసుకుంటే.. ఐఫోన్‌ లేదా ట్యాబ్‌లను వినియోగిస్తున్న వారి ఇల్లు, కార్యాలయాలను ఎప్పటికప్పుడు ట్రాక్‌ చేస్తుంటుంది. ఇలా తరచూ వెళ్లే ప్రదేశాలు కాకుండా వేరే చోట డివైజ్‌ను యాక్సెస్‌ చేసినప్పుడు స్టోలెన్‌ డివైజ్‌ తన పని మొదలుపెడుతుంది. మీ ఫోన్‌/ట్యాబ్‌కు అదనపు సెక్యూరిటీని యాడ్‌ చేస్తుంది. డివైజులను యాక్సెస్‌ చేయాలంటే కచ్చితంగా ఫేస్‌ఐడీ లేదా టచ్‌ ఐడీ స్కాన్‌ వినియోగాన్ని తప్పనిసరి చేస్తుంది. ఈ ఫీచర్‌ను యాపిల్‌ యూజర్లు వినియోగించుకోవాలని సంస్థ సూచిస్తోంది.