TMC: ఎంపీ వాహనం ఢీకొని.. నాలుగేళ్ల చిన్నారి మృతి

కోల్‌కతా: పశ్చిమ బెంగాల్‌లోని ముర్షిదాబాద్‌లో విషాద ఘటన చోటుచేసుకుంది. తృణమూల్‌ కాంగ్రెస్‌ ఎంపీ అబూ తాహెర్‌ ఖాన్‌ వెళ్తోన్న కారు  నాలుగేళ్ల చిన్నారిని ఢీకొట్టింది.  తీవ్రంగా గాయపడిన  బాలుడిని .. ఎంపీ వెంటనే ఆస్పత్రికి తీసుకెళ్లారు. తలకు బలమైన గాయం కావడంతో  చికిత్స పొందుతూ  బాలుడు మృతి చెందినట్లు వైద్యులు వెల్లడించారు. కుమారుడి మరణవార్త విన్న తల్లిదండ్రులు.. మీడియా, వైద్యు  ముందు తీవ్రంగా విలపించారు.

‘మా వాహనం వెళ్తున్న సమయంలో ఓ బాలుడు పరుగెత్తుకుంటూ వచ్చాడు. ఐదు, ఆరేళ్ల వయసు ఉంటుంది. ఆ బాలుడిని మేమే ఆస్పత్రికి తరలించాం. నా కళ్లముందే ఇదంతా జరిగింది. బాలుడి మెదడుకు తీవ్ర గాయాలై ఉంటాయి’ అని ఆసుపత్రి బయట ఉన్న మీడియాకు ఎంపీ తాహెర్‌ ఖాన్‌ వెల్లడించారు. ఈ ఘటనను సుమోటో కేసుగా నమోదు చేసుకున్న పోలీసులు ఎంపీ కారును సీజ్‌ చేశారు. అనంతరం డ్రైవర్‌ను అదుపులోకి తీసుకున్నట్లు వెల్లడించారు. తన తల్లితో కలిసి చిన్నారి రోడ్డు దాటుతున్న సమయంలో ఈ ప్రమాదం జరిగినట్లు అనుమానిస్తున్నారు.