Toopran: వివాహేతర సంబంధం పెట్టుకున్నాడని.. యువకుడికి చిత్రహింసలు

తూప్రాన్‌, న్యూస్‌టుడే: స్నేహితుడి శరీరంపై వాతలు పెట్టి చిత్రహింసలకు గురిచేసిన ఘటన మెదక్‌ జిల్లా తూప్రాన్‌లో సోమవారం వెలుగు చూసింది. పోలీసులు, స్థానికుల కథనం ప్రకారం.. మనోహరాబాద్‌ మండలం లింగారెడ్డిపేటకు చెందిన నారాయణ అలియాస్‌ కిట్టు తూప్రాన్‌కు చెందిన సాయి, జితేందర్‌, మరోవ్యక్తి స్నేహితులు. ఆదివారం రాత్రి ముగ్గురూ కలిసి కిట్టు(25)ను తూప్రాన్‌కు పిలిచారు. వీరంతా సాయి ఇంటికి వెళ్లి మద్యం తాగారు. రాత్రి 11 గంటల ప్రాంతంలో ముగ్గురూ కిట్టును విద్యుత్తు తీగలతో కట్టేశారు. శరీరంతోపాటు మర్మాంగాలు, నాలుకపై వాతలు పెట్టారు. బాధితుడు వారినుంచి తప్పించుకుని ఒంటిపై దుస్తులు లేకుండానే 44వ నంబరు జాతీయ రహదారి మీదుగా దాబాల వద్దకు చేరుకున్నాడు. విషయం తెలుసుకున్న కుటుంబసభ్యులు అతన్ని తూప్రాన్‌ ప్రభుత్వాస్పత్రికి తరలించారు. ఒక మహిళతో కిట్టు వివాహేతర సంబంధం పెట్టుకోవడమే కాకుండా ఆమె పుట్టింటికి వెళ్లేందుకు కారణమయ్యాడన్న కక్షతో ఈ ఘాతుకానికి ఒడిగట్టినట్లు పోలీసులు తెలిపారు. కేసు నమోదుచేసి దర్యాప్తుచేపట్టారు.