జమ్మూకశ్మీర్‌లో కాల్పులు.. గ్రామ రక్షక భటుడి మృతి

జమ్ము: జమ్మూకశ్మీర్‌లోని ఉధంపుర్‌ జిల్లాలో మారుమూల గ్రామమైన పనారాలో కాల్పులు కలకలం సృష్టించాయి. ఆదివారం తెల్లవారుజామున గ్రామంలో పహారా కాస్తున్న పోలీసులు, గ్రామ రక్షక భటుల (విలేజ్‌ డిఫెన్స్‌ గార్డ్స్‌) బృందానికి ఉగ్రవాదులు ఎదురుపడటంతో ఇరు వర్గాల మధ్య కాల్పులు చోటుచేసుకున్నాయి ఈ ఘటనలో మొహద్‌ షరీఫ్‌ అనే గ్రామ రక్షక భటుడు ప్రాణాలు కోల్పోయారు. అరగంట పాటు కాల్పులు చోటు చేసుకోగా.. భద్రతా సిబ్బంది కళ్లుగప్పి ఉగ్రవాదులు అడవుల్లోకి పారిపోయారు. వారి కోసం పోలీసులు, సైన్యం, సీఆర్పీఎఫ్‌ సిబ్బంది సంయుక్తంగా ముమ్మర గాలింపు చర్యలను చేపట్టినట్లు అధికారులు తెలిపారు. ఉగ్రవాదులు ఇటీవలే పాకిస్థాన్‌ వైపు నుంచి చొరబడినట్లు సమాచారం ఉందని చెప్పారు.