రైస్‌మిల్లులో పేలిన బాయిలర్‌

సుల్తానాబాద్‌ గ్రామీణం, న్యూస్‌టుడే: రైస్‌మిల్లులో ప్రమాదవశాత్తు బాయిలర్‌ పేలి భారీ ప్రమాదం సంభవించింది. ఈ ఘటన పెద్దపల్లి జిల్లా సుల్తానాబాద్‌ మండలం కాట్నపల్లి శివారులో బుధవారం తెల్లవారుజామున చోటుచేసుకుంది. మిల్లు నడుస్తున్న సమయంలోనే ఈ ఘటన జరగడంతో అందులో పనిచేస్తున్న గంగారం కుమార్, తిరువల్ల రామస్వామి అనే ఇద్దరు కార్మికులు తీవ్రంగా గాయపడ్డారు. వారిని చికిత్స కోసం ఆసుపత్రికి తరలించారు. వీరిలో గంగారం కుమార్‌ పరిస్థితి విషమంగా ఉన్నట్లు తెలిసింది. ఈ ఘటనలో మిల్లులోని యంత్రాలు, ఇతర సామగ్రి ముక్కలుకాగా.. అందులోని ధాన్యం, ఇతరత్రా వంద మీటర్ల వరకు చెల్లాచెదురయ్యాయి. మిల్లు పక్కనున్న పంట పొలాల్లోనూ వ్యర్థాలు పడటంతో పంటలు దెబ్బతిన్నాయి.