Crime: కన్నతల్లిపై ఓ న్యాయవాది కర్కశత్వం

చండీగఢ్‌: వృద్ధాప్యంలో ఉన్న తల్లికి అండగా నిలవాల్సిన కుమారుడే ఆమె పాలిట రాక్షసంగా ప్రవర్తించాడు.  తోటి కుటుంబ సభ్యులతో కలిసి ఆమెను చిత్రహింసలకు గురిచేశాడు. ఈ ఘటన పంజాబ్‌ (Punjab)లో చోటు చేసుకుంది. పోలీసుల కథనం ప్రకారం..

రూప్‌నగర్‌లో నివాసముంటున్న అంకుర్‌ వర్మ న్యాయవాదిగా పనిచేస్తున్నాడు. ఇటీవల అతడి తండ్రి గుండెపోటుతో మరణించారు. మరోవైపు అంకుర్‌ తల్లి మానసిక స్థితి కూడా బాగోలేదు. అయితే అతడి కుటుంబ సభ్యులు తరచూ ఆ వృద్ధురాలిని వేధించడం మొదలుపెట్టారు. అంకుర్‌ కుమారుడు తన నానమ్మ బయటకు వెళ్లిన సమయంలో.. ఆమె బెడ్‌పై నీరు పోశాడు. పైగా ఆ వృద్ధురాలిపై తండ్రికి ఫిర్యాదు చేశాడు.

ప్రాణాలు పోతున్నా.. 48 మందిని కాపాడాడు

దీంతో ఆగ్రహానికి గురైన అంకుర్‌ విచక్షణ కోల్పోయి తల్లిపై దాడికి దిగాడు. ఆమెను తీవ్రంగా గాయపర్చాడు. ఆ తర్వాత అంకుర్‌ సోదరి దీప్షిఖా తల్లిని చూసేందుకు వచ్చింది. ఆ వృద్ధురాలి ఆరోగ్య పరిస్థితి చూసి అనుమానంతో గదిలో ఉన్న సీసీటీవీ పరిశీలించడంతో విషయం తెలిసింది. దీంతో దీప్షిఖా పోలీసులకు ఫిర్యాదు చేయడంతో ఈ దారుణం వెలుగులోకి వచ్చింది. పోలీసులు నిందితుడిని అరెస్టు చేశారు. ప్రస్తుతం బాధితురాలు ఆసుపత్రిలో చికిత్స పొందుతున్నట్లు తెలిపారు.