Sangareddy: వాగులోకి దూసుకెళ్లిన ట్రాక్టర్.. ముగ్గురి మృతి

సదాశివపేట: స్టీరింగ్‌ రాడ్డు విరగడంతో ట్రాక్టర్‌ అదుపుతప్పి బోల్తాపడి ఒకే గ్రామానికి చెందిన ముగ్గురు మృతి చెందారు. ఈ ఘటన సంగారెడ్డి జిల్లాలో శనివారం మధ్యాహ్నం చోటు చేసుకుంది. సదాశివపేట మండలం కొల్కూరు గ్రామానికి చెందిన మంగలి గోపాల్‌(30), ఈటల రమణ(45), ఎంపల్లి మల్లేశ్‌(30) ట్రాక్టరుపై కొల్కూరు వెళ్తుండగా గ్రామ శివారులో ట్రాక్టర్‌ స్టీరింగ్‌ విరిగింది. దీంతో ట్రాక్టర్‌ అదుపుతప్పి పక్కనే ఉన్న వాగులోకి దూసుకెళ్లింది. ఈ ప్రమాదంలో ట్రాక్టర్‌పై ఉన్న ముగ్గురూ అక్కడికక్కడే మృతి చెందారు. దీంతో కొల్కూరు గ్రామంలో విషాదఛాయలు అలముకున్నాయి. మృతదేహాలను శవపరీక్ష కోసం సంగారెడ్డి జిల్లా ఆసుపత్రికి తరలించారు.