బ్రాహ్మణ సమాజం ఏకం కావాలి: నాగబాబు

లక్ష్మీ గణపతి హోమం చేస్తున్న నాగబాబు, పద్మ దంపతులు

పిఠాపురం: బ్రాహ్మణ సమాజ అభ్యున్నతికి బ్రాహ్మణులంతా ఏకం కావాలని జనసేన పార్టీ రాష్ట్ర ప్రధాన కార్యదర్శి కె.నాగబాబు పిలుపునిచ్చారు. ఆదివారం పిఠాపురంలో బ్రహ్మణ సంఘాలు నాగబాబును కలిసి పలు సమస్యలపై వినతి పత్రాలు అందజేశారు. ఈ సందర్భంగా ఆయన మాట్లాడుతూ పిఠాపురాన్ని టెంపుల్‌ సర్క్యూట్‌ సిటీగా అభివృద్ధి చేసేందుకు పవన్‌ కల్యాణ్‌ సిద్ధంగా ఉన్నారన్నారు. ఇందుకోసం కూటమి ప్రభుత్వం అధికారంలోకి వచ్చిన తరువాత రూ.100 కోట్లు కేటాయిస్తారన్నారు. ఎన్నికల మేనిఫెస్టోలోనూ ఈ విషయాన్ని పొందుపరిచారని చెప్పారు. దేవస్థానాలపై దాడులు జరిగినప్పుడు ఎవరూ ముందుకు వచ్చిన దాఖలాలు లేవని, వైకాపా నాయకులు చాలా తేలికగా ఈ విషయాలు తీసుకున్నారన్నారు. పవన్‌ ఒక్కరే ఈ విషయంపై తీవ్రస్థాయిలో స్పందించారన్నారు. అనంతరం, పిఠాపురంలోని విరవాడ రోడ్డులో జరిగిన లక్ష్మీ గణపతి హోమంలో నాగబాబు, పద్మా దంపతులు పాల్గొన్నారు. ప్రత్యేక పూజలు నిర్వహించారు. వేద ఆశీర్వాచనాలు పొందారు.