15 స్ట్రాంగ్‌ రూముల్లో.. 5వేల ఈవీఎంలు

జిల్లా ఎన్నికల అధికారి రోనాల్డ్‌రాస్‌ 

ఈనాడు, హైదరాబాద్‌: సికింద్రాబాద్‌, హైదరాబాద్‌ ఎంపీ స్థానాలకు, సికింద్రాబాద్‌ కంటోన్మెంట్‌ అసెంబ్లీ నియోజకవర్గం ఎన్నికకు సంబంధించి ఈవీఎంలను సిద్ధం చేశామని జీహెచ్‌ఎంసీ కమిషనర్‌, జిల్లా ఎన్నికల అధికారి రోనాల్డ్‌రాస్‌ వెల్లడించారు. చాదర్‌ఘాట్‌లోని విక్టరీ క్రీడా ప్రాంగణంలో తాజాగా రెండో దశ ర్యాండమైజేషన్‌ పూర్తయిందని, తదనంతర ప్రక్రియలో భాగంగా వాటిని అసెంబ్లీ నియోజకవర్గాలవారీగా విభజించి, 15 స్ట్రాంగ్‌ రూముల్లో భద్రపరిచినట్లు తెలిపారు. ఇటీవలి అసెంబ్లీ ఎన్నికల స్ట్రాంగ్‌ రూములనే ఎంపీ ఎన్నికలకు ఉపయోగించుకుంటున్నామని చెప్పారు. ఓట్ల లెక్కింపు ప్రక్రియ అక్కడే జరగనుందన్నారు. జిల్లాలోని 4వేల పోలింగ్‌ కేంద్రాలకు 5వేల ఈవీఎంలను సిద్ధం చేశామన్నారు. ముందు జాగ్రత్తగా పోలింగ్‌ కేంద్రాలకన్నా ఎక్కువ సంఖ్యలో ఈవీఎంలను సమకూర్చుకుని, కొన్నింటిని రిజర్వులో ఉంచుతామని పేర్కొన్నారు. ఎండల వల్ల వీవీప్యాట్లలో సమస్య తలెత్తే అవకాశం ఉన్నందున, వాటిని మరింత ఎక్కువ మొత్తంలో సమకూర్చుకున్నట్లు గుర్తుచేశారు.