హాసనలో లైంగిక దౌర్జన్యాలపై సిట్‌

హాసన, న్యూస్‌టుడే : హాసన జిల్లాలో ఓ పార్టీకి చెందిన యువ నాయకుడు యువతులు, మహిళలపై లైంగిక దౌర్జన్యాలకు పాల్పడుతున్నాడని ఫిర్యాదులు వచ్చాయి. యువతులపై లైంగిక దౌర్జన్యానికి పాల్పడిన వీడియోలు తీసుకుని అవసరమైన సమయంలో శారీరక అవసరాలను తీర్చుకుంటున్నారని తమకు ఫిర్యాదులు అందాయని రాష్ట్ర మహిళా కమిషన్‌ అధ్యక్షురాలు నాగలక్ష్మి చౌదరి తెలిపారు. దర్యాప్తు వేగవంతం చేసేందుకు ప్రత్యేకంగా సిట్ ఏర్పాటు చేయాలని ముఖ్యమంత్రి సిద్ధరామయ్యకు లేఖ రాశానని ఆమె తెలిపారు. ఆమె లేఖ నేపథ్యంలోనే ప్రత్యేక తనిఖీ దళం (సిట్‌) ఏర్పాటు చేస్తూ ఉన్నతాధికారులు శనివారం రాత్రి నిర్ణయం తీసుకున్నారు. అశ్లీల చిత్రాలు, వీడియోలను పెన్‌ డ్రైవ్‌లలో ఉంచి విక్రయిస్తున్నారని, మాజీ ముఖ్యమంత్రి హెచ్‌డీ కుమారస్వామి కొద్ది నెలల కిందట ప్రదర్శించిన పెన్‌డ్రైవ్‌లో అటువంటి వీడియోలే ఉండి ఉంటాయని ఉప ముఖ్యమంత్రి డీకే శివకుమార్‌ ఆరోపించారు.