చేపల వేట.. చెరువుకే చేటంట

జేసీబీతో చెరువు కట్టను తొలగిస్తున్న దృశ్యం

సంతనూతలపాడు, న్యూస్‌టుడే: చేపల వేట కోసం ఏకంగా చెరువుకే చేటు తెచ్చిన వైనమిది. సంతనూతలపాడు మండలం ఎనికపాడులో మంచినీటి చెరువు పక్కన సుమారు 32 ఎకరాల్లో మరొకటి ఉంది. ఇందులో కొద్దిరోజుల క్రితం వరకు పుష్కలంగా నీరుండేది. చేపల పెంపకందారులు ఇటీవల వాటిని పట్టించేందుకు నిర్ణయించారు. దీంతో తూముల నుంచి బయటకు వదిలారు. ఇంకా 40 శాతం వరకు నీరు చెరువులో ఉండిపోయింది. చేపలు పట్టేందుకు వీలుపడదంటూ ఈ నీటిని బయటకు పంపేందుకు సిద్ధపడ్డారు. ఇందుకుగాను శనివారం సాయంత్రం ఏకంగా జేసీబీ సాయంతో కట్టను తొలగించే పని చేపట్టారు. సుమారు 10 నుంచి 15 అడుగుల వెడల్పు 15 అడుగుల ఎత్తు కలిగిన కట్టను తవ్వేశారు. విషయం తెలుసుకున్న గ్రామస్థులు అక్కడికి చేరుకుని తవ్వకం పనులను అడ్డుకున్నారు. చేపల వేట కోసం ఏకంగా కట్టను ధ్వంసం చేయడం ఏంటని ప్రశ్నించారు. నీరు ఖాళీ చేస్తే ఖరీఫ్‌ సీజన్‌లో పంటల సాగుకు ఇబ్బందులు ఎదుర్కోవాల్సి వస్తుందని ఆవేదన వ్యక్తం చేశారు.

అడ్డుకునేందుకు కట్టపై గుమిగూడిన గ్రామస్థులు