గద్దెనెక్కి గొప్పలు.. గోతులతోనే ముగింపు

శంకుస్థాపన సమయంలో నిర్మాణ సామగ్రితో నిండుగా కనిపిస్తున్న ప్రదేశం

తాళ్లూరు, దర్శి, ముండ్లమూరు, చీమకుర్తి ప్రాంతాలకు ప్రస్తుతం మద్దిపాడు మండలంలోని ఉపకేంద్రం నుంచి విద్యుత్తు సరఫరా అవుతోంది. దీంతో తరచూ అవాంతరాలు తలెత్తుతూ సమస్యలు ఎదురవుతున్నాయి. ఈ వెతలకు చరమగీతం పలకాలని గత తెదేపా ప్రభుత్వం నిర్ణయించింది. రూ.22 కోట్ల అంచనా వ్యయంతో తాళ్లూరు మండలం గుంటిగంగ సమీపంలో 132/33 కె.వి.విద్యుత్తు ఉపకేంద్రం నిర్మాణానికి ప్రతిపాదనలు రూపొందించింది. అంతలోనే అధికారం మారి వైకాపా గద్దెనెక్కింది. 2019లో మరికొంత మొత్తం పెంచి 22.65 కోట్ల అంచనా వ్యయంతో నిర్మాణానికి అధికారులు టెండర్లు పిలిచారు. 2021 డిసెంబరు నాటికి పనులు పూర్తిచేసేలా ఓ సంస్థ పనులు దక్కించుకుంది. 2020 జనవరి 17న అప్పటి విద్యుత్తు శాఖా మంత్రి బాలినేని శ్రీనివాసరెడ్డి శంకుస్థాపన చేశారు. అప్పటికే రూ. కోట్ల విలువజేసే సామగ్రిని సిద్ధం చేశారు. పునాదుల కోసం గోతులు కూడా తీశారు. ఆ తర్వాత ఒక్క పని కూడా ముందుకు సాగలేదు. పట్టించుకున్నవారు లేకపోయారు. గుత్తేదారు సంస్థను మార్చి మళ్లీ టెండర్లు పిలవాలని అధికారులు నిర్ణయించినప్పటికీ పాలనా కాలం కాస్తా ముగింపునకు వచ్చేసింది.

ఈనాడు, ఒంగోలు