పారిజాత గిరి ప్రదక్షిణ

ప్రదక్షిణను ప్రారంభిస్తున్న ఆలయ అభివృద్ధి కమిటీ ఛైర్మన్‌ జగపతిరాజు

జంగారెడ్డిగూడెం, న్యూస్‌టుడే: జంగారెడ్డిగూడెం పట్టణంలోని గోకుల తిరుమల పారిజాతగిరి వేంకటేశ్వరస్వామి ఆలయ పరిధిలో సోమవారం గిరి ప్రదక్షిణ ప్రారంభమైంది. ఆలయం కొండ చుట్టూ 2.50 కిలోమీటర్ల ప్రదక్షిణ చేసేలా ప్రత్యేకమార్గం ఏర్పాటుచేశారు. దీన్ని ఆలయ అభివృద్ధి కమిటీ ఛైర్మన్‌ పేరిచర్ల జగపతిరాజు ప్రారంభించారు. ఈ సందర్భంగా జరిగిన పూజల్లో ఈవో మానికల రాంబాబు, అభివృద్ధి కమిటీ సభ్యులు, పురపాలక ఛైర్‌పర్సన్‌ బత్తిన లక్ష్మి తదితరులు పాల్గొన్నారు. ప్రధాన అర్చకుడు నల్లూరు రవికుమారాచార్యులు మాట్లాడుతూ అభివృద్ధి కమిటీ ఆధ్వర్యంలో గిరి మార్గాన్ని సుమారు రూ.20 లక్షలు వెచ్చించి ఏర్పాటు చేశారన్నారు. మంచిరోజు కావడంతో ప్రదక్షిణను ప్రయోగాత్మకంగా ప్రారంభించారని, రహదారిని మరింత అభివృద్ధి చేశాక మరోసారి పూర్తిస్థాయిలో చేపడతామన్నారు.