గ్రంధి ఏనాడైనా పవన్‌లా సేవ చేశారా?

జనసేన నాయకుడు రామమోహనరావు

ఈనాడు డిజిటల్‌, అమరావతి: ఓటమి తప్పదని తెలిసి ప్రజల దృష్టిని మరల్చడానికే ఎమ్మెల్యే గ్రంధి శ్రీనివాస్‌ మెగా బ్రదర్స్‌పై ఆరోపణలు చేస్తున్నారని జనసేన పార్టీ అధికార ప్రతినిధి అక్కల రామమోహనరావు విమర్శించారు. జనసేన అధినేత పవన్‌కల్యాణ్‌ను రాజకీయ వ్యాపారవేత్త అని విమర్శించిన శ్రీనివాస్‌ ఏనాడైనా ఆయనలా పేదలకు సహాయం చేశారా అని సోమవారం ప్రశ్నించారు. ‘భీమవరంలో కనిపించిన స్థలాలన్నీ కబ్జాచేసి, ప్రజలను భయభ్రాంతులకు గురిచేసిన భూబకాసురుడు గ్రంధి. ఈ ఎన్నికల్లో డిపాజిట్లు గల్లంతవ్వడం ఖాయం. కొవిడ్‌ సమయంలో ఆక్సిజన్‌ బ్యాంకులు ఏర్పాటు చేసిన చిరంజీవి సేవలను ఎవరూ మర్చిపోరు. ఆయన చేసిన మేలును రాష్ట్రంలోని ప్రతీ ఒక్కరికి తెలుసు. కొవిడ్‌ సమయంలో మెగా బ్రదర్స్‌ సేవ చేస్తుంటే వైకాపా మాత్రం ప్రజలను దోచుకుంది’ అని ఓ ప్రకటనలో విమర్శించారు.