వైకాపా నాయకులవి చిల్లర రాజకీయాలు : చింతమనేని

పెదవేగి, న్యూస్‌టుడే: వైకాపా నాయకులు చిల్లర రాజకీయాలు చేస్తూ.. మళ్లీ గద్దె నెక్కాలని చూస్తున్నారని.. ఈసారి ప్రజలెవరూ నమ్మరని ఎన్డీయే దెందులూరు అసెంబ్లీ అభ్యర్థి చింతమనేని ప్రభాకర్‌ అన్నారు. శనివారం దుగ్గిరాలలో ఆయన విలేకరుల సమావేశంలో మాట్లాడుతూ గతంలో దిగజారుడు రాజకీయాలతో గద్దెనెక్కారని, ఇప్పుడూ అదే విధంగా అధికారం దక్కించుకోవాలని  చూస్తున్నారన్నారు. వైకాపా నేతల ఆరోపణలకు మే 13న ప్రజలు తీర్పు చెబుతారని పేర్కొన్నారు. గతంలో దెందులూరు మండలం శ్రీరామవరంలో దళితులపై తాను వ్యాఖ్యలు చేసినట్లు అసత్య ప్రచారం చేశారని... అలాగే శుక్రవారం రాత్రి పెదవేగి మండలం లక్ష్మీపురంలో జరిగిన ఘటనలోనూ ఒక శాతమూ వాస్తవం లేదన్నారు. ఎన్నికల్లో ఎవరైనా ఓట్లడుగుతారు కానీ దాడి చేస్తారా.. ఇంకెన్నాళ్లు కట్టుకథలు చెబుతారని ప్రశ్నించారు.   ఉక్రోషాన్ని తట్టుకోలేకే దెందులూరు నియోజకవర్గ వైకాపా నాయకులు దిగజారుడు రాజకీయాలు చేస్తున్నారని విమర్శించారు.జనసేన రాష్ట్ర కార్యదర్శి ఘంటసాల వెంకటలక్ష్మి మాట్లాడుతూ ఎన్డీయే కూటమి అభ్యర్థులకు వస్తున్న ప్రజాదరణను చూసి వైకాపా నాయకులకు దుర్బుద్ధి పుట్టిందన్నారు.