తెలుగు ప్రముఖుడు వెంకటరమణ మృతికి సంతాపం

కేవీ వెంకటరమణ (పాతచిత్రం)

బెంగళూరు (యలహంక), న్యూస్‌టుడే : యలహంక ప్రభుత్వ తెలుగు పాఠశాల వ్యవస్థాపకుడు, నగరసభ మాజీ కౌన్సెలర్‌ కె.వి.వెంకటరమణ (78) శనివారం మధ్యాహ్నం మృతిచెందారు. ఆయన మృతికి స్థానిక తెలుగు ప్రముఖులతో పాటు స్థానిక శాసనసభ్యుడు ఎస్‌.ఆర్‌. విశ్వనాథ్‌, సింగనాయకనహళ్లి రైతు సేవా సహకార బ్యాంకు అధ్యక్షురాలు వాణీశ్రీ భాజపా ప్రధాన కార్యదర్శి వీవీరామమూర్తి తదితరులు సంతాపం వ్యక్తం చేశారు. ఆదివారం ఆయన అంత్యక్రియలు నిర్వహించారు. కడప జిల్లా రాయచోటికి చెందిన ఆయన, బతుకుదెరువు కోసం యలహంకకు వచ్చి చేనేత మగ్గాల కార్మికుడిగా, అనంతరం మగ్గాల యజమానిగా పలువురికి ఉపాధి కల్పించారు. తెలుగు భాషపై అభిమానంతో 17ఏళ్ల క్రితం రూ.లక్ష విలువ చేసే భూమిని తెలుగు పాఠశాలకు ఉచితంగా ఇవ్వడంతో పాటు పాఠశాల భవనాన్ని నిర్మించారు. కొండప్పలేఔట్‌లో తెలుగు ఉన్నత పాఠశాల కోసం సొంత భూమిలో మూడు అంతస్తుల పాఠశాలను నిర్మించారు. ప్రవాసాంధ్రులు అధిక సంఖ్యలో ఉన్న యలహంకలో వారి పిల్లలు మాతృభాషలో చదువు సాగించేందుకు తెలుగు పాఠశాలను ప్రారంభించి అభివృద్ధి చేసిన ఘనత కేవీ వెంకటరమణకు దక్కుతుందని స్థానిక తెలుగు ప్రముఖులు తెలిపారు.