YSRCP: ఎమ్మెల్యే X సర్పంచి

జగనన్న సురక్ష కార్యక్రమంలో వాగ్వాదం
అధికార పార్టీలో బయటపడిన విభేదాలు

ఎమ్మెల్యే నవాజ్‌బాషా ఎదుట సర్పంచి బుడ్డయ్య 
(వృత్తంలో ఉన్న వ్యక్తి)తో వాగ్వాదానికి దిగిన ఎమ్మెల్యే అనుచరులు

మదనపల్లె గ్రామీణ, న్యూస్‌టుడే: మదనపల్లె ఎమ్మెల్యే నవాజ్‌బాషాకు స్థానిక ప్రజాప్రతినిధులకు మధ్య విభేదాలు రోజురోజుకు ముదురుతున్నాయి. ఇటు మదనపల్లె పురపాలక సంఘంలో, అటు గ్రామ పంచాయతీల్లోని ప్రజాప్రతినిధులు ఆయన తీరును విమర్శిస్తూనే ఉన్నారు. తాజాగా మదనపల్లె మండలం దుబ్బిగానిపల్లెలో శుక్రవారం జరిగిన జగనన్న సురక్ష కార్యక్రమంలో ఎమ్మెల్యే నవాజ్‌ బాషా, సర్పంచి బుడ్డయ్య మధ్య వాగ్వాదం చోటుచేసుకుంది. దుబ్బిగానిపల్లెలో సర్పంచి బుడ్డయ్య అధ్యక్షతన జగనన్న సురక్ష కార్యక్రమం జరిగింది. చివరగా ఎమ్మెల్యే నవాజ్‌బాషా మాట్లాడుతుండగా సర్పంచి లేచి తాను మాట్లాడతానని చెప్పారు. ఎమ్మెల్యే అసహనం వ్యక్తం చేస్తూ ‘తొలుత మైకు ఇచ్చాం కదా... గొడవ పెట్టుకునేందుకు వచ్చావా..? ఇక్కడి నుంచి వెళ్లిపో’ అంటూ మండిపడ్డారు. నేనెందుకు వెళ్తాను, ఇది నా పంచాయతీ నీవే ఇక్కడి నుంచి వెళ్లిపోమని సర్పంచి ఎదురు సమాధానం చెప్పడం వివాదానికి దారి తీసింది. ఎమ్మెల్యే అనుచరులు జోక్యం చేసుకుని సర్పంచిపై వాగ్వాదానికి దిగడంతో ఇరువురిని గ్రామస్థులు, స్థానిక నాయకులు అడ్డుకున్నారు. దీంతో కొంతసేపు ఉద్రిక్త వాతావరణం నెలకొంది. సీఐ సత్యనారాయణ, పోలీసులు అక్కడికి చేరుకుని సర్పంచిని అక్కడి నుంచి పంచాయతీ సచివాలయంలోనికి తీసుకెళ్లడంతో సమస్య సద్దుమణిగింది. ఇద్దరూ అధికార పార్టీకి చెందిన వారే కావడం, అంతర్గత విభేదాలు బహిర్గతం కావడంతో ఈ విషయం చర్చనీయాంశంగా మారింది.