NASA: ‘విండో సీట్‌’ నుంచి క్లిక్‌.. సింగిల్‌ ఫ్రేమ్‌లో అంతరిక్షం-భూమి!

ఇంటర్నెట్‌ డెస్క్‌: అంతరిక్షానికి సంబంధించిన ఎన్నో విశేషాలు, కీలక సమాచారాన్ని అమెరికా స్పేస్‌ ఏజెన్సీ (NASA) తెలియజేస్తూనే ఉంటుంది. ఈ క్రమంలో తాజాగా పంపించిన ఫొటోలను తన సామాజిక మాధ్యమ వేదికలో పోస్టు చేసింది. అంతర్జాతీయ అంతరిక్ష కేంద్రానికి వెళ్తున్న సమయంలో స్పేస్‌ఎక్స్‌ డ్రాగన్‌ ఎండ్యూరాన్స్‌లోని కిటికీ నుంచి వ్యోమగాములు తీసిన అద్భుతమైన ఫొటో ఎంతగానో ఆకట్టుకుంటోంది.

అంతర్జాతీయ అంతరిక్ష కేంద్రానికి (ISS) నలుగురు వ్యోమగాములతో స్పేస్‌ఎక్స్‌ డ్రాగన్‌ ఆగస్టు నెలలో బయలుదేరింది. ఐఎస్‌ఎస్‌కి చేరువైన సమయంలో వ్యోమనౌక కిటికీ నుంచి తీసిన చిత్రంలో భూమి అద్భుతంగా కనిపించింది. ఓవైపు అంతరిక్షం, మరో వైపు భూమి సింగిల్‌ ఫ్రేమ్‌లో కనిపించాయి. ఆఫ్రికా, ఐరోపా ఖండాలు, వాటి మధ్య నీలి రంగులో జిబ్రాల్టర్‌ జలసంధితో కూడిన మనోహరమైన దృశ్యం కెమెరాలో బంధించారు. దీన్ని ఇన్‌స్టాలో షేర్‌ చేసిన నాసా.. ‘విండో సీట్‌, ఎనీవన్‌?’ అంటూ కామెంట్‌ చేసింది.