ఇటు మనిషి.. అటు సింహం.. ఆపై ఏమైంది?

ఇంటర్నెట్‌డెస్క్‌: ఇవతలి వైపు ఓ వ్యక్తి. అవతలి వైపు సింహం. మధ్యలో పెద్ద నీటి మడుగు. జనం ఊపిరి బిగపట్టి చూస్తున్నారు. సింహం ఆ మనిషి దగ్గరకు వచ్చింది. చూసేవాళ్ల గుండె వేగం పెరుగుతోంది. ఇక... ఆ క్రూరమృగం మనిషిపై దాడి చేయడం ఖాయం అనుకున్నారంతా. కానీ, అతగాడి దగ్గరికి రాగానే సింహంలో స్పష్టమైన మార్పు. ఎవరూ ఊహించని విధంగా ఆ వ్యక్తిని ప్రేమతో ముద్దాడసాగింది. ఎందుకంటే ఏడేళ్ల కిందట ఆ సింహాన్ని కాపాడిన ప్రాణదాత అతను. క్రూర మృగాన్ని సైతం తన ప్రేమతో కట్టిపడేసిన ఆ వ్యక్తి ప్రఖ్యాత వన్యప్రాణి సంరక్షకుడు కెవిన్‌ రిచర్డ్‌సన్‌. ఫేస్‌బుక్‌ పోస్ట్‌ చేసిన ఈ వీడియో ఆన్‌లైన్‌లో వైరల్‌ అయింది. బాగా మచ్చిక చేసుకుంటే పులులు, సింహాలు మనుషులకు ఎలాంటి హాని చేయకుండా ఉండటం సహజమే.. కానీ ఇన్నేళ్ల తర్వాత కూడా ఇలా జరగడం విచిత్రం అంటున్నారంతా. ఈ వీడియోకి కామెంట్లు పోటెత్తుతున్నాయి. ‘ఈ వీడియో చూసి నాకు కన్నీళ్లాగలేదు’ అని ఒకరంటే.. ‘ఈ బంధం అపురూపంగా ఉంది. పొద్దంతా చూస్తూనే ఉన్నాను’ అంటూ మరొకరు కామెంట్‌ చేశారు.