Metro Rail: హైదరాబాద్‌ మెట్రో రైల్‌ మరింత స్పీడ్‌గా.. ప్రయాణికులకు సమయం ఆదా

హైదరాబాద్‌: హైదరాబాద్‌ మెట్రో రైళ్లు మరింత వేగంగా వెళ్లేందుకు కమిషనర్‌ ఆఫ్‌ మెట్రోరైల్వే సేఫ్టీ (సీఎంఆర్‌ఎస్‌) అనుమతించినట్టు ఎల్‌అండ్‌టీ మెట్రో ఎండీ, సీఈవో కేవీబీ రెడ్డి వెల్లడించారు. ఇప్పుడున్న వేగం కంటే మరో పది కిలోమీటర్లు వేగంగా వెళ్లేందుకు అనుమతి లభించింది. రైళ్ల వేగాన్ని గత నెల 28, 29 తేదీల్లో కమిషనర్‌ ఆఫ్‌ మెట్రోరైల్వే సేఫ్టీ ఉన్నతాధికారులు పరిశీలించారు. వేగం పెరగడంతో దూర ప్రాంతాలకు వెళ్లేందుకు సమయం తగ్గనుంది. నాగోలు - రాయదుర్గం మధ్య 6 నిమిషాల ప్రయాణ సమయం, మియాపూర్‌ - ఎల్బీనగర్‌ మధ్య 4 నిమిషాలు, జేబీఎస్‌ - ఎంజీబీఎస్‌ మధ్య 1.5 నిమిషాల ప్రయాణ సమయం ఆదా కానుంది. గతంలో 80 కిలోమీటర్ల వేగంతో మెట్రో రైలు వెళ్లేది. పెంచిన వేగంతో 90 కిలోమీటర్ల వేగంతో వెళ్లనున్నట్టు అధికారులు ప్రకటించారు. కానీ, ప్రతి స్టేషన్‌ వద్ద ఆగడంతో ఈ వేగం సాధారణంగా కొంత వరకు తగ్గనుంది.