పాకిస్థాన్‌ అనుకూల నినాదాలు.. నిజమని తేలితే కఠిన చర్యలు తప్పవు : సీఎం సిద్ధరామయ్య

బెంగళూరు: కర్ణాటకలో రాజ్యసభ ఎన్నికల (Rajya Sabha elections) ఫలితాలు వెలువడిన సమయంలో కొందరు పాకిస్థాన్‌కు మద్దతుగా నినాదాలు చేయడం కలకలం రేపింది. ఆ వ్యక్తిని తక్షణమే అరెస్టు చేయాలని విపక్ష భాజపా పట్టుబట్టింది. ఈ పరిణామాలపై ముఖ్యమంత్రి సిద్ధరామయ్య స్పందించారు. పాకిస్థాన్‌ (Pakistan) అనుకూల నినాదాలు చేసినట్లు నిజమని తేలితే కఠిన చర్యలు తీసుకుంటామని వెల్లడించారు.

‘కేవలం భాజపానే ఆ ఆరోపణలు చేయలేదు. మీడియా కూడా అదే విషయాన్ని చెబుతోంది. వాయిస్‌ రిపోర్టును ఫోరెన్సిక్‌ సైన్స్‌ ల్యాబ్‌కి పంపించాం. దేశ వ్యతిరేక నినాదాలు చేయడం వాస్తవమని అందులో తేలితే.. ఆ వ్యక్తిపై కఠిన చర్యలు తీసుకుంటాం. అటువంటి వారిని విడిచిపెట్టే ప్రశ్నే లేదు’ అని ముఖ్యమంత్రి సిద్ధరామయ్య (Siddaramaiah) పేర్కొన్నారు.

ఆ దారుణాలపై మాట్లాడుతుంటే వణుకువస్తోంది: నిర్మలమ్మ

రాజ్యసభ ఎన్నికల్లో భాగంగా కాంగ్రెస్‌ అభ్యర్థి నాసిర్‌ హుసేన్‌ విజయం సాధించినట్లు అధికారులు ప్రకటించారు. ఆ వెంటనే విధానసౌధలో నాసిర్‌ వెనుక ఉన్న ఓ వ్యక్తి పాకిస్థాన్‌ అనుకూల నినాదాలు చేయడం తీవ్ర కలకలం రేపింది. నాసిర్‌ హుసేన్‌ స్పందిస్తూ.. అలా నినదించిన వ్యక్తి ఎవరో తనకు తెలియదని, శత్రుదేశానికి అనుకూలంగా నినాదాలు చేయడం సరికాదని పేర్కొంటూ వాటిని ఖండించారు. అధికారులు దర్యాప్తుచేసి, ఆ వ్యక్తిని గుర్తించాలని కోరారు.