కేరళలో దోషికి మరణదండన, 92 ఏళ్ల జైలుశిక్ష.. జరిమానా

ఈటీవీ భారత్‌: ఆరేళ్ల బాలుడిని హత్య చేసి, అతడి సోదరి (14)పై అత్యాచారం జరిపిన కేసులో దోషి సునీల్‌కుమార్‌ (44)కు కేరళలోని ఇడుక్కి స్పెషల్‌ పోక్సో కోర్టు శనివారం మరణదండనతోపాటు ఏకంగా 92 ఏళ్ల జైలుశిక్ష విధించింది. రూ.9.91 లక్షల జరిమానా వేసింది. డబ్బు కట్టకపోతే.. మరో 11 ఏళ్లు అదనంగా శిక్ష అనుభవించాలని తీర్పునిచ్చింది. విడివిడిగా నాలుగు యావజ్జీవ శిక్షలు, ఇతర సెక్షన్ల కింద కోర్టు వేసిన శిక్షాకాలం కలిపితే 92 ఏళ్లు అవుతుంది. ఇడుక్కి జిల్లాలోని అణాంచల్‌ సమీపంలో 2021 అక్టోబర్‌ 2వ తేదీ తెల్లవారుజామున తలుపులు పగులగొట్టి బాధితుల ఇంట్లోకి సునీల్‌ ప్రవేశించాడు. మొదట బాలుడి తలపై సుత్తితో కొట్టి చంపాడు. ఓ వృద్ధురాలిపై, పక్క గదిలో ఉన్న మహిళ తలపైనా దాడి చేశాడు. బాలికను షెడ్డులోకి తీసుకువెళ్లి అత్యాచారానికి పాల్పడ్డాడు. సునీల్‌ బాధితుల బంధువేనని.. కుటుంబ వివాదాల కారణంగా ఇలా చేశాడని దర్యాప్తులో తేలింది.