Facebook love: పాక్‌ ప్రియుణ్ని పెళ్లాడిన భారత మహిళ

ఇస్లాం స్వీకరించి ఫాతిమాగా మారిన అంజూ

పెషావర్‌: ప్రియుణ్ని కలుసుకోవడానికి పాకిస్థాన్‌ వెళ్లిన రాజస్థాన్‌ మహిళ అంజూ (34) వ్యవహారంలో అనూహ్య పరిణామం చోటుచేసుకుంది. ఖైబర్‌పఖ్తుంఖ్వా ప్రావిన్సు అప్పర్‌ దిర్‌ జిల్లాలోని స్థానిక కోర్టులో అంజూ, ఆమె ప్రేమికుడు నస్రుల్లా (29) మంగళవారం వివాహం చేసుకున్నారని డీఐజీ స్థాయి అధికారి ఒకరు వెల్లడించారు. ‘‘వివాహం ముందు అంజూ ఇస్లాం స్వీకరించి ఫాతిమాగా పేరు మార్చుకున్నారు. ఎవరి బలవంతం లేకుండా నిఖా చేసుకుంటున్నామని వధూవరులు అంగీకరించారు. బంధువులు, న్యాయవాదులు, న్యాయమూర్తులు, పోలీసుల సమక్షంలో ఇస్లాం సంప్రదాయం ప్రకారం ఈ వివాహం జరిగింది’’ అని ఆయన పేర్కొన్నారు. వివాహం చేసుకోవడానికి ముందు సోమవారం అంజూ, నస్రుల్లాలు భారీ భద్రత నడుమ స్థానిక పర్యాటక ప్రాంతాల్లో విహరించారు. ఒక గార్డెన్‌లో ఇద్దరూ చేతిలో చేయి వేసుకుని ఫొటోలు కూడా తీయించుకున్నారు. మరోవైపు తన పాక్‌ పర్యటన అకస్మాత్తుగా జరిగినది కాదని అంజూ (ఫాతిమా) చెప్పినట్లు పాక్‌ వార్తా సంస్థ జియో తన కథనంలో పేర్కొంది. తన ప్రేమను వెతుక్కుంటూ పాక్‌ వచ్చానని, ఇక్కడే ఉండిపోతానని అంజూ తమకు చెప్పినట్లు స్థానిక పోలీసు అధికారి ఒకరు వెల్లడించారని ఈ కథనం పేర్కొంది.