బడికి వెళ్లాలంటే.. కొండలు ఎక్కాల్సిందే

ఉత్తరాఖండ్‌లో భారీవర్షాల కారణంగా కొండచరియలు విరిగిపడి రోడ్లు దెబ్బతినడంతో రాకపోకలకు తీవ్ర అంతరాయం ఏర్పడి ప్రజలు ఇబ్బందులు పడుతున్నారు. చమోలీ జిల్లాలోని గోపేశ్వర్‌ గ్రామ విద్యార్థులు బడికి వెళ్లేందుకు ఏకంగా కొండలనే ఎక్కాల్సి వస్తోంది. ఈ ఊరి చుట్టూ ఉన్న దాదాపు 30కు పైగా రోడ్లు మూసుకుపోయాయి. దీంతో కొండలు ఎక్కేందుకు చిన్నారులు.. తల్లిదండ్రుల సహాయం తీసుకొంటున్నారు. కొండలు ఎక్కుతున్న సమయంలో జారి కిందపడతారేమోనని తల్లిదండ్రులు ఆందోళన వ్యక్తం చేస్తున్నారు. గోపేశ్వర్‌తోపాటు చుట్టుపక్కల మరో రెండు మూడు గ్రామాల్లో ఇవే పరిస్థితులు ఉన్నట్లు చమోలీ జిల్లా కలెక్టర్‌ తెలిపారు. 150 మంది విద్యార్థులు ఇక్కడి నుంచి స్కూలుకు వెళుతున్నారని, వారికోసం ప్రత్యామ్నాయ ఏర్పాట్లు చేస్తామని చెప్పారు.