మణిపుర్‌లో రెచ్చిపోయిన మిలిటెంట్లు

భద్రతా సిబ్బంది శిబిరంపై 2 గంటల పాటు కాల్పులు
ఇద్దరు జవాన్ల మృతి, మరో ఇద్దరికి గాయాలు

ఇంఫాల్‌: ఈశాన్య రాష్ట్రం మణిపుర్‌లో మిలిటెంట్లు రెచ్చిపోయారు. బిష్ణుపుర్‌ జిల్లాలోని భద్రతా సిబ్బంది శిబిరంపై రెండు గంటల పాటు కాల్పులకు తెగబడ్డారు. ఈ ఘటనలో ఇద్దరు సీఆర్పీఎఫ్‌ సిబ్బంది అమరులయ్యారు. మరో ఇద్దరికి గాయాలయ్యాయి. నరన్‌సైనా ప్రాంతంలోని ఇండియా రిజర్వ్‌ బెటాలియన్‌ శిబిరంపై శుక్రవారం అర్ధరాత్రి దాటిన తర్వాత మిలిటెంట్లు కాల్పులకు దిగినట్లు అధికారులు తెలిపారు. కొండ ప్రాంతం నుంచి విచక్షణారహితంగా కాల్పులు జరపడంతో పాటు బాంబులు విసిరినట్లు పేర్కొన్నారు. ఈ ఘటనలో సీఆర్పీఎఫ్‌ సబ్‌ ఇన్‌స్పెక్టర్‌ ఎన్‌.సర్కార్‌, హెడ్‌ కానిస్టేబుల్‌ అరూప్‌ సైనీ మరణించగా, మరో ఇద్దరు జవాన్లు గాయపడినట్లు వెల్లడించారు. దాడికి పాల్పడిన వారి ఆచూకీ కోసం గాలింపు చర్యలు చేపట్టినట్లు పోలీసులు తెలిపారు.