Rajasthan: అవాక్కైన డాక్టర్లు..! పొట్టలో మేకులు.. సూదులు.. తాళం చెవులు

జైపుర్‌: కడుపు నొప్పితో బాధపడుతోన్న ఓ యువకుడికి శస్త్రచికిత్స నిర్వహించిన వైద్యులకు ఊహించని షాక్‌ తగిలింది. అతని పొట్టలో నుంచి మేకులు, సూదులు, తాళం చెవులు, నట్లు, బోల్టుల వంటి లోహాపు వస్తువులు బయటపడటం గమనార్హం. రాజస్థాన్‌ (Rajasthan) రాజధాని జైపుర్‌లో ఈ వ్యవహారం వెలుగుచూసింది.

ఆస్పత్రి వైద్యులు తెలిపిన వివరాల ప్రకారం.. తీవ్ర కడుపు నొప్పితో బాధపడుతూ ఓ యువకుడు (21) ఇటీవల జైపుర్‌లోని సవాయ్‌ మాన్‌సింగ్‌ ఆస్పత్రిలో చేరాడు. దీంతో వైద్యులు అతడికి ఎక్స్‌రే, సీటీ స్కాన్‌ వంటి పరీక్షలు నిర్వహించారు. ఈ క్రమంలోనే అతడి పొట్టలో ఇనుప వస్తువులు పేరుకుపోయినట్లు గుర్తించారు. వాటిలో కొన్ని పెద్ద పేగులోకీ వెళ్లిపోయినట్లు గమనించారు. దీంతో వైద్య బృందం అతడికి లాప్రోస్కోపీ, కొలనోస్కోపీ నిర్వహించింది. దాదాపు మూడు గంటలపాటు శస్త్రచికిత్స నిర్వహించి ఆ వస్తువులను తొలగించినట్లు వైద్యులు వెల్లడించారు. రోగి ఆరోగ్య పరిస్థితి ప్రస్తుతం స్థిరంగా ఉందని చెప్పారు.

దొరకని శరీర భాగాలు.. మిస్టరీగానే బంగ్లా ఎంపీ మృతి ఘటన!

అయితే.. ఆ యువకుడి మానసిక స్థితి సరిగ్గా లేదని, ఈ క్రమంలోనే ఇనుప మేకులు, సూదులు వంటివాటిని మింగినట్లు అంతకుముందు అతడి కుటుంబ సభ్యులు తెలిపారు. ఈ క్రమంలోనే నొప్పి రావడంతో తొలుత ఆళ్వార్‌లోని ఆస్పత్రికి తరలించామని, అనంతరం జైపుర్‌కు తీసుకొచ్చినట్లు చెప్పారు. మరోవైపు.. సరైన చికిత్స కోసం అతడి మానసిక పరిస్థితిని విశ్లేషిస్తున్నట్లు వైద్యులు తెలిపారు.