Ashika ranganath: వరలక్ష్మీ.. ఎత్తుకెళ్లి పోవాలనిపిస్తోందే!

‘నా సామిరంగ’తో సినీప్రియుల్ని పలకరించనున్నారు నాగార్జున. ఆయన కథానాయకుడిగా నటిస్తున్న ఈ చిత్రాన్ని నృత్య దర్శకుడు విజయ్‌ బిన్నీ తెరకెక్కిస్తున్న సంగతి తెలిసిందే. శ్రీనివాసా చిట్టూరి నిర్మాత. ఆషికా రంగనాథ్‌ కథానాయికగా నటిస్తోంది. ఆమె ఈ చిత్రంలో వరలక్ష్మి అనే పాత్రలో కనిపించనున్నట్లు తెలియజేస్తూ చిత్ర బృందం సోమవారం ఫస్ట్‌లుక్‌, గ్లింప్స్‌ను విడుదల చేసింది. ఆ ప్రచార చిత్రంలో ఆషికా లంగాఓణీలో అద్దం ముందు కూర్చొని అందంగా ముస్తాబవుతుంటే.. నాగార్జున బయట గోడ దగ్గర నుంచొని ఆమె అందాన్ని ఆస్వాదిస్తూ రొమాంటిక్‌గా కనిపించారు. త్వరలోనే ఈ సినిమా నుంచి ‘‘ఎత్తుకెళ్లి పోవాలనిపిస్తోందే’’ అనే పాటను విడుదల చేయనున్నట్లు ఈ గ్లింప్స్‌తోనే స్పష్టత ఇచ్చింది చిత్ర బృందం. ఇదొక భిన్నమైన పీరియాడిక్‌ యాక్షన్‌ డ్రామా చిత్రం. ఇందులో నాగ్‌ శక్తిమంతమైన మాస్‌ పాత్రలో కనిపించనున్నారు. అల్లరి నరేశ్‌, రాజ్‌తరుణ్‌ కీలక పాత్రలు పోషిస్తున్నారు. ముగింపు దశ చిత్రీకరణలో ఉన్న ఈ సినిమా త్వరలో ప్రేక్షకుల ముందుకు రానుంది. ఈ చిత్రానికి సంగీతం: ఎం.ఎం.కీరవాణి, ఛాయాగ్రహణం: దాశరథి శివేంద్ర.