Bhagavanth Kesari: గణేశ్‌ పాటతో శ్రీకారం

ఈ సంక్రాంతికి ‘వీరసింహారెడ్డి’గా బాక్సాఫీస్‌ ముందు దూకుడు చూపించారు కథానాయకుడు బాలకృష్ణ. ఇప్పుడీ దసరాకు ‘భగవంత్‌ కేసరి’గా అలరించేందుకు సిద్ధమవుతున్నారు. ఆయన.. కాజల్‌ జంటగా నటించిన ఈ చిత్రాన్ని అనిల్‌ రావిపూడి తెరకెక్కించారు. సాహు గారపాటి, హరీష్‌ పెద్ది సంయుక్తంగా నిర్మించారు. శ్రీలీల, అర్జున్‌ రాంపాల్‌ కీలక పాత్రలు పోషించారు. ఈ సినిమా అక్టోబరు 19న థియేటర్లలోకి రానుంది. ఈ నేపథ్యంలోనే పాటలతో ప్రచార పర్వాన్ని పరుగులు పెట్టించేందుకు సిద్ధమైంది చిత్ర బృందం. ఇందులో భాగంగా సెప్టెంబరు 1న ఈ చిత్రం నుంచి ‘గణేశ్‌..’ పాటను విడుదల చేయనున్నారు. ఈ విషయాన్ని ప్రకటిస్తూ కొత్త పోస్టర్‌ను పంచుకున్నారు. అందులో బాలయ్య మాస్‌ లుక్‌లో హుషారుగా డ్రమ్స్‌ కొడుతూ కనిపించారు. మాస్‌ యాక్షన్‌ ఎంటర్‌టైనర్‌గా తెరకెక్కిన ఈ సినిమాలో బాలకృష్ణ తెలంగాణ యాసలో సంభాషణలు పలకనున్నారు. ఆయన పాత్ర రెండు కోణాల్లో కనిపించనుంది. ఈ చిత్రానికి సంగీతం: తమన్‌, ఛాయాగ్రహణం: సి.రామ్‌ప్రసాద్‌.