Devil: సరికొత్త అవతారంలో...

పంచ్‌ పవర్‌ ఇంత బలంగా ఉంటుందంటూ తన కొత్త సినిమాని ప్రత్యేక పోస్టర్‌తో ప్రకటించారు కల్యాణ్‌రామ్‌ (Kalyan Ram). ఆయనకి ఇది 21వ చిత్రం. ప్రదీప్‌ చిలుకూరి దర్శకత్వం వహిస్తున్న ఆ సినిమాని ఎన్టీఆర్‌ ఆర్ట్స్‌తో కలిసి అశోక్‌ క్రియేషన్స్‌ పతాకంపై అశోక్‌ వర్ధన్‌ ముప్పా, సునీల్‌ బలుసు నిర్మిస్తున్నారు. ముప్పా వెంకయ్య చౌదరి సమర్పకులు. బుధవారం కల్యాణ్‌రామ్‌ పుట్టినరోజు. ఈ సందర్భంగా ఆయన కొత్త సినిమాని అధికారికంగా ప్రకటించారు. కల్యాణ్‌రామ్‌ కెరీర్‌లోనే అత్యంత భారీ వ్యయంతో ఈ సినిమా రూపొందుతోందని, ఆయన సరికొత్త యాక్షన్‌ అవతారంలో కనిపిస్తారని సినీ వర్గాలు తెలిపాయి. విజయవంతమైన ‘అలా ఎలా?’ తర్వాత అశోక్‌ క్రియేషన్స్‌ నిర్మిస్తున్న చిత్రమిది. ప్రస్తుతం కల్యాణ్‌రామ్‌ ‘డెవిల్‌’ చేస్తున్నారు. ఆ సినిమా తర్వాత పట్టాలెక్కనున్న చిత్రం ఇదే.  త్వరలోనే నటీనటులు, సాంకేతిక బృందం వివరాల్ని వెల్లడించనున్నారు.

థ్రిల్లింగ్‌ ‘డెవిల్‌’

కల్యాణ్‌రామ్‌ నటిస్తున్న ‘డెవిల్‌’ ప్రచార చిత్రాన్ని బుధవారం విడుదల చేశారు. ‘స్వాతంత్య్రానికి పూర్వం ‘డెవిల్‌’ అనే ఓ బ్రిటిష్‌ ఏజెంట్‌ ఉండేవాడు...’ అంటూ కల్యాణ్‌రామ్‌ పాత్రని పరిచయం చేశారు. ఆయన సీక్రెట్‌ ఏజెంట్‌ పాత్రలో రహస్యాన్ని ఛేదించే పాత్రలో సందడి చేయనున్నారు. యాక్షన్‌, థ్రిల్లింగ్‌ అంశాల మేళవింపుగా ఈ సినిమా రూపొందుతోంది. కల్యాణ్‌రామ్‌ సరసన సంయుక్త మేనన్‌ నటించారు. నవీన్‌ మేడారం దర్శకత్వంలో అభిషేక్‌ నామా ఈ చిత్రాన్ని నిర్మిస్తున్నారు. తెలుగుతోపాటు హిందీ, తమిళం, కన్నడ భాషల్లో ఒకేసారి ప్రేక్షకుల ముందుకు తీసుకొస్తారు. శ్రీకాంత్‌ విస్సా ఈ చిత్రానికి కథ, మాటలు, స్క్రీన్‌ప్లే సమకూర్చారు.