sri krishna pandaveeyam movie: క్రమశిక్షణలో ఎన్టీఆర్‌ కాఠిన్యం!

ఇంటర్నెట్‌డెస్క్‌: చేసే పనిని దైవంగా భావించి, అందరికీ ఆదర్శంగా నిలిచిన మహా నటుడు నందమూరి తారక రామారావు. పనిపట్ల ఆయనకు ఉండే అంకితభావం చాలా తక్కువ మందికి ఉంటుందంటే ఆశ్చర్యం లేదు. ఉదయం 6గంటలకు షూటింగ్‌ అంటే, 5.45గంటలకే మేకప్‌ వేసుకుని మరీ వచ్చే నటుడు మరొకరు లేరంటే అతిశయోక్తి కాదు. క్రమశిక్షణ, సమయపాలనలో ఆయనను చూసి ప్రతి నటుడు భయపడాల్సిందే.

1966లో ఎన్టీఆర్‌ ‘శ్రీకృష్ణ పాండవీయం’ తీశారు. ఆయనే దర్శకుడు. కె.ఆర్‌.విజయ నాయిక. ఆమె అప్పుడప్పుడే తెలుగు సినిమాల్లో నటిస్తున్నారు. షూటింగ్‌ జరుగుతున్న రోజుల్లో, కె.ఆర్‌.విజయ సెట్టుకి ఆలస్యంగా రావడమే కాకుండా, సమాచారం లేకుండా రెండు రోజులు షూటింగ్‌కు రాలేదు. దాంతో ఎన్‌.టి.ఆర్‌. అగ్గిపిడుగు అయిపోయారు. క్రమశిక్షణ, నిష్ఠ పాటించే ఆయన సహించలేక, ఆమె వల్ల తనకి ఇంత నష్టం కలిగిందని, ఇది చెల్లించకపోతే తన చిత్రం నుంచి తీసేస్తానని, అప్పుడు మరింత నష్టం కలుగుతుందనీ కోర్టుకి వెళ్లారు. ఎన్టీఆర్‌ కఠినమైన క్రమశిక్షణ సంగతి తెలియని విజయ, దెబ్బకి దిగివచ్చారు. వెంటనే రాజీపడి, తన వల్ల కలిగిన నష్టాన్ని చెల్లించి, అపరాధానికి క్షమాపణ కోరి సినిమాలో కొనసాగారు. అప్పటి నుంచి ఆమె ఒక్కసారి కూడా సెట్టుకు ఆలస్యంగా రాలేదు.. ఏనాడూ మళ్లీ షూటింగ్‌ మానలేదు.